Group F pakhatna tur Netherlands?

Football thiam vanga ram hriat hlawh Netherlands chuan kumin World Cup-a an match hnuhnung ber atan, naktuk zing dar 4:30 hian Tunisia nen an inhmachhawn dawn a. Round of 32 tling tawh leh tla tawh inkhel tur ni mah se Netherlands tan an pakhatna an nih theihna hriltu a nih dawn avangin Oranje tan inkhel pawimawh a ni.

An match hmasa berah Ronald Koeman-a naute hi Japan nen an inhnehtawk a, mahse Sweden lakah 5-1 a hnehna changin group stage an paltlang chiang tawh a, player ṭhenkhat tan hahdamna hun a siamsak nih pawhin a mak lo ang.

Sweden lakah Koeman-a'n Brian Brobbey bul a ṭantir a, mahse a tisual lo. Sunderland forward goal bawh a na a, goal hnih a khung bakah an khingpuite tan a hnawk a, bul a ṭan nawn a rinawm.

Hetihlai hian Donyell Malen aiah Crysencio Summerville-a'n bul a ṭan a rinawm tawh bawk a, Malen hi khel chhe lo mah se goal a la khung thei lo a, Brobbey a chet ṭhat bawk avangin goal hnih khung tawh Summerville chu bul ṭan tura hming ri ring zawk a ni.

Tunisia erawhin beisei tur an nei tawh lo a, an manager Sabri Lamouchi an ban hnuah African football-a tawnhriat nei ṭha, Hervé Renard chhawr nghal mah se awmzia a nei thui lo a, Japan lakah 4-0 a an chak loh avangin group stage-ah

an tla.

Chutihrualin Tunisia hi pressure nei loa khel tur an ni tawh a, mualpho taka World Cup mangṭha an duh dawn bik loh avangin Netherlands tan zuam chi an ni dawn bik lo.

Netherlands hian goal an khung hnem zawk avangin Japan aiin an sawng zawk a, hmahruaitu ni chunga group stage khar an duh a nih chuan Samurai Blue aia goal an khung hnem a ngai dawn.