A tawp nan USA

World Cup 2026-a beisei phak baka team hmuhnawm thlang dawn ila, an inkhel entute chuan Mauricio Pochettino enkawl USA an thlang fur ang - World Cup thlengtu ram zinga mi hi an khel a hmuhnawm tlat!

USA hian naktuk zing dar 7:30-ah Turkey an hmachhawn dawn a, mahse, Poch-a nauten round of 32 an luh tawh avangin he inkhel result hian awmzia a nei thui tawh lo - Turkey lah an tla fel diam tawh.

Fixture a chhuah tirh khan team pahnih inkhel tur hi inkhel en châkawm zinga chhiar tel theih a ni a, mahse, Turkey beisei phak loh zarah leh, beisei aia USA ṭhat zarah inkhel tikimtu pakhat chauh a ni.

USA hian Turkey hi ngam lo pawh ni se, group D hmahruaitu an ni chiang tawh tho - an hnuaia awm Australia leh Paraguay ten point-ah chuan la um phak thei mah se, head-to-head ah an chungnun avangin tluk theih an ni tawh lo.

AC Milan forward Christian Pulisic-a'n USA match hmasa ber khel ṭha viau mah se, hliam vangin lakchhuah a ngai a, Australia a hmachhawn thei lo - naktuk zingah pawh a inlan rih loh a rinawm zawk.

US tan hian midfielder Cristian Roldan a inhliam rih bawk a, mahse, ani erawh a dam pawha bul ṭan lo a nih avangin buaina lutuk tur a awm lo.

Poch-a tan round of 32 thlir ran chunga indahṭhat hun pawh a ni ve thei a, chuti a nih chuan match hmasa pahniha bul ṭan lo, Borussia Mönchengladbach midfielder Giovanni Reyna tan pawh hmun a awm thei ang.

Turkey-in beisei tur nei tawh lo mah se, chak nei miah loa USA hawsan chu an tan mualphona belhchhahtu a ni dawn - hei vang hian naktuk zingah an ṭhat dan bera an inrem a ngai dawn.

Kum 2002 hnua a vawi khat nana World Cup khel Turkey hian Inter Milan midfielder Hakan Calhanoglu, Juventus winger Kenan Yildiz leh Real Madrid midfielder Arda Guler te ho an awm a, chak nei miah loa an haw a nih chuan mualphona tawpkhawk a tling ang.