Paraguay vs Australia: Tu nge tlang dawn?

World Cup group D aṭangin USA an tlang chiang tawh a, hmun ruak a la awm - Paraguay leh Australia ten point thum ve ve an nei tawh a, Zirtawpni zing dar 7:30 inkhela chak zawkin round of 32 an lut ang.

Hetihrual hian team pahnih inkhel tur hi a awlsam zawngin sawi theih a ni a, an in draw chuan point li ve ve hmuin, team pahnih hi an tlang daih thei - an in draw erawh chuan goal difference-a ṭha zawk Australia hi pahnihna an ni ang.

World Cup-ah group tina a sang pahnih bakah, group 12 aṭanga pathumna tiṭha zual pariat an tlang dawn a, point li hi pathumna tiṭha zinga tel nan a tawk thei tura ngaih a ni.

Hetihrual hian group stage-a pathumna ni chunga tlang hi round of 32-a team ṭha zawk hmachhawnna a ni thei a, chuvangin Australia leh Paraguay hian hei hi pumpelh an tum ve ve dawn.

Australia tan draw result a tawk a, Paraguay tan an group-a pahnihna ni tur chuan chak ngei ngei a ngai thung - Paraguay an chak erawh chuan match hmasa bera Turkey an hneh avanga hlim tak Australia hi an tla daih thei!

Thil thlen theih dan a awm nual a, hei vang hian team pahnih tan chak tum mai chu buaina tur tam tak chinfelna ṭha a ni - naktuk zingah an player neih ṭhat an thawhchhuahpui ve ve ang.

USA laka 2-0 a an tlawm ṭumin coach Tony Popovic-a'n Nestory Irankunda chu rin loh takin bench-ah a dah a, Watford forward a luhtir hnuah an game a nung sawt. Paraguay lakah chuan kum 20 mi player beiseiawm hi bul a ṭantir tawh ngei a rinawm.

Paraguay hi an ṭhat dan berin an inlan thei dawn lo a, hei tak hi an tan buaina a ni thei - Turkey laka hnawhchhuah Miguel Almiron a inlan thei dawn lo a, Almiron tel lo chuan an goal nawr a na lo sawt ang.

Brighton & Hove Albion midfielder Diego Gomez pawh Turkey lakah lakchhuah a ngai a, mahse, Australia chu hmachhawn hman tura beisei a ni.

Australia player zingah winger Mathew Leckie dinhmun a chiang lo a, USA lakah khan hliam vanga lakchhuah a ni - naktuka a inlan theih dawn leh dawn loh he thu buatsaih a nih lai hian a la chiang lo.