Norway lakah Deschamps awm dawn lo

France head coach Didier Deschamps chu a nu a thih avangin an ramah a haw a, Zirtawpni zana Norway an hmachhawn hunah a team a ho thei dawn lo

Deschamps-a nu hi Thawhlehni zing khan a thi a, a thih chhan hi tarlan a ni lo. French Football Federation (FFF) president Philippe Diallo chuan Deschamps hi a vuina a kal a phalsak.

FFF chuan thuchhuah siamin Deschamps a lo let leh hma chu assistant coach, Guy Stephan-a'n France hi a lo kaihhruai rih tur thu an sawi.

Kum 57 mi Deschamps hian player a nih laiin 1998 khan France hi World Cup-ah a lo champion pui tawh a, 2000 khan Euro nomawi a chawipui bawk

Kum 2012 khan an ram a enkawl ṭan a, 2018-ah khan Russia-ah World Cup final-ah hnehna an chang a, kum 2022-ah khan Argentina lakah final-ah an tlawm thung. Kum 2016 Euro-ah final a hruai thleng bawk a, Deschamps hi France football tan a hlu hle.

France hian kar hmasa khan Senegal chu 3-1 in an hneh a, Pathianni zan khan Iraq chu 3-0 a an hneh lehin round of 32 khel turin an tling tawh a, Deschamps-a tel lo pawhin an ngaihtuahawm loh ang.