Colombia-in second round an lut

FIFA World Cup 2026-ah nimin zing khan Colombia-in Daniel Munoz goal hmangin DR Congo 1-0 in an hneh a, match hnihah point ruk hmuin second round an lut. Néstor Lorenzo hote hian June 28, Pathianni tlai dar 5:00-ah Portugal an hmachhawn dawn a, point an hmuh hrim hrim chuan group K-ah pakhatna an ni ang.

Zapopan-ah Colombia-in football hmuhnawm an khel a, DR Congo keeper Lionel Mpasi a rim hle. Crystal Palace defender Daniel Munoz a hmuhnawm a, Colombian right back hian mual ding lam aṭangin a nawr ṭha hle.

Munoz hian first half-ah chance ṭha hlah mah se minute 76-naah a phu angin chakna goal a khung. Colombia goal bawh a na a, James Rodríguez pawhin first half-ah ṭha zetin goal-ah a pet. Bayern Munich winger Luis Díaz a vanduai a, chance ṭha a hlah bakah a goal khung ṭum hnih an pawmsak lo.

Tun ṭum inelnaah Colombia tan Munoz a che ṭha a, Congo laka goal a khung hma hian Uzbekistan lakah goal a khung. World Cup vangin Munoz-a hlutna a san phah sawt ang.

Group K pakhatna hian second round-ah pathumna team hmachhawn dawn mah se quarterfinal-ah Argentina hmachhawn thei dinhmunah an ding. Chutihrualin pahnihna erawhin final-ah chauh Lionel Messi awmna Argentina an hmachhawn thei ang. Quarterfinal-a Messi leh Ronaldo inkhel en tur a awm dawn a nih chuan group match hnuhnung berah Portugal-in Colombia an hneh a ṭul ang.