Blue Tigers hahum ri a ring India 4-1 Thailand - A hunah tak Jeje

Mizo tlangval Jeje Lalpekhlua'n Asian Cup-ah goal 'class' a khung a, Thailand lakah India-in 4-1 in hnehna an chang. 

India tan Sunil Chhetri chuan Asian level-ah pawh striker ṭha tak a ni tih pholangin goal hnih a khung a, Anirudh Thapa goal khung lah sawisel bo a ni. 

Abu Dhabi khawpuia inkhelah mipuiin an beisei loh result an hmu a, chak tura rinkai zawk Thailand chu India hmaah an zawr - captain Teerasil Dangda goal khung pawhin awmzia a nei lo.

Kum 55 hnua a vawi khat nan Asian Cup-ah India-in hnehna an chang ve leh ta a, 'Milian mutthlu' tia a chanchin an sawi ṭhin Indian football team a ṭhangharh mek a, a tuar hmasatu chu Thailand an ni. 

FIFA ranking-ah Thailand aiin India sang ringawt mah se player mal khaia lakin War Elephants hian player an nei ṭha zawk a, India tan point thum hmuh a harsa dawn tih a chiang. 

Thailand tan Manchester City leh Almeria midfielder hlui Teerasil Dangda chuan captain armband a rawn hreng a, Japanese club ṭha Vissel Kobe tana khel Theerathon Bunmathan leh J League Team of the Year-a tel pha Chanathip Songkrasin te an awm nghal bawk avangin India fan-te an zam ru a nih pawhin a mak lo. 

India coach Stephen Constantine-a'n rin loh takin Sunil Chhetri chu captain armband a hren tir lo a, goalkeeper Gurpreet Singh Sandhu chuan captain dinhmun a luah.  Jeje chuan a khup hliam vangin bul a ṭan a inbeisei loh thu Vanglaini a hrilh lawk a, Hnahthial tlangval aiah hian Ashique Kuruniyan chu luhtir a ni.

Rin lawk ang ngeiin Thailand-in inkhel an thunun. Ball an chang tam a, chance an neih leh zauh ṭhin karah Indian player-te erawh hmuh tur an awm meuh lo. 

Thailand tan Thitiphan Puan-gjan leh Tristan Do ten an hun ṭha neih an chhawr loh hnuah minute 27-naah India-in penalty an hlawh chhuak. Kuruniyan-a shot chu goalkeeper Chatchai Budprom-a'n a dan per hnuah defender Theerathon Bunmathan kut a per zui a, referee-in penalty spot a kawk. 

Inkhel boruak sangah penalty pet turin Chhetri a rawn pen chhuak a, kum 34 mi striker hian inkhel boruak sangah zam hmel pu hauh loin goal-ah a chantir a, thawm chu ring tak a ni.

Thailand-in inkhel an thunun chhunzawm miau avangin India hlim chhung a rei lo. Minute ruk hnu lawkah penalty chawitu Bunmathan-a'n a tihsual thup nan freekick ṭha zet a pet a, positioning fuh tawk lo Sandhu tana dan hman lohin Dangda chuan a tauh lut. 

India-in first half-ah bul ṭan ṭha lo mah se chawlhlawk hnua inlan India erawh team dang daih an ni. Second half an ṭan chauh a, a tir lama khel chhe tak Udanta Singh chuan ṭha taka ball tlanpuiin Chhetri tak a siamsak a, India captain hian goal-a chantir turin harsatna a nei lo. 

Thailand lamin ball chan tam chhunzawm mah se India counter attack an dawl zo lo. Udanta leh Kuruniyan an hmuhnawm a, Chhetri che vel a hlauhawm reng a, Halicharan Narzary a thawkrim em em bawk. 

Minute 68-na a ni a, India bawkin an pet goal chhunzawm - Udanta bawkin assist a nei a, Manipur winger ball pek chu Anirudh tan  duhthusam ni lo mah se Chennaiyin midfielder hian class zetin a awl laiah tak a chip lut.

Commentator-ten vawi tam Jeje hming an lam hnuah hun tawp nan minute 12 chiah a awm tawh tihah Hnahthial tlangval hi luhtir a ni a, khelmualah minute hnih chiah hun a hmang hman tihin Narzary-a ball siamsak chu a ke chhipin mawi zetin a thlawh lut a, India an chak chiang. 

India coach Stephen Constantine chuan hnehna chan tuma khel ni mah se 4-1 a chak erawh an beisei loh thu sawiin, "Match kan khelh apiangah hnehna chan kan tum a, heti zata hnehna chan erawh kan beisei lo. 

"Phul hlutna hun a la ni lo a, hmabak kan la nei a ni. Group stage paltlang tur hian point hnih tal kan la mamawhah ka ngai a, training kan chhunzawm lehnghal ang," tiin hahchawl thei an la nih loh thu a sawi. 

India hian January 10-ah an match hnihna chu inelna thlengtu United Arab Emirates nen an khel leh dawn a, January 14-ah Bahrain an tawng leh dawn bawk. 

Group tin aṭangin a sang pahnih bakah pathumna zinga a ti ṭha pali chuan knockout round an lut dawn a, India tan Asian Cup-a last 16 lut turin dinhmun a ṭha hle.

Jeje-a tan kum 2018 kha kum duhawm tia chhiar chi a ni lo. Indian Super League tun season-ah goal a la khung miah lo a, June 4-a Kenya laka a goal khung kha India tana a goal khung hnuhnung ber a ni bawk. 

Mahse, a hunah tak Mizo tlangval Jeje Lalpekhlua a inlar chhuak a, inrintawkna nei let tura a mamawh goal chu Asia khawmualpuia football inelna sang bera a match hmasa berah a khung nghal. 

Jeje hian goal a khung zawhah van lam kawkin lawmthu a sawi a, social media lamah he thlalak hi pholangin Sam 37:5 tih a ziak tel a, he Bible chang hi, "I awm dan tur chu LALPA chungah nghat la; amah chu ring la, ama'n a ti vek ang." tih a ni. 

Ram tan match 53-a inlana a goal 23-na khungtu Jeje chuan, "Pathian vang tak tak a ni e, a hunah tak A lo lang leh ṭhin," tiin a goal khung chu Pathian puihna vang a nih thu Vanglaini a hrilh. 

Nimin, January 14 kha Jeje-a birthday a ni a, Hnahthial tlangval tan hei lo liama piancham thilpek lawmawm a awm kher lo ang.

India laka an mualpho hnuin Thailand Football Association an inngaihtuah rei lo - an buaina chinfelna a nih beiseiin coach Milovan Rajevac an ban thu an puang chhunzawm nghal!

Football Association of Thailand president Somyot Poompanmoung chuan thuchhuah siamin, "India laka kan result kha min ṭantuten an phu lo a, Thai national team lak aṭanga kan beisei a ni lo bawk. 

"Thai football fan-te ang thoin ka lunghnur em em a, FA President ka nihna angin he buaina hi ka thlir reng thei lo a ni," tiin an coach ban chhan a sawifiah a, Asian Cup khelh chhung chu assistant coach Sirisak Yodyathai chuan enkawl lailawk ang. 

Kum 65 mi Rajevac hian Ghana, Al Ahli, Qatar leh Algeria te pawh a lo enkawl tawh a, Ghana hi kum 2010 World Cup-ah inpetkai puiin quarterfinal hial a hruai thleng.