Aizawl FC-in coach Gift banna pawm Khalid Jamil-a'n Bagan a zawm

Aizawl FC chuan coach Gift Raikhan banna thehluh chu nimin khan an pawm thu an tichiang. Mizo club hi I League-a champion puitu coach hlui Khalid Jamil nen sawi rik ni mah se Mohun Bagan lamah coach hna a ruah chiah avangin Mumbai FC coach hlui hi Kolkata club lamah a kal ta zawk.

Nimin khan Aizawl FC-in Gift Raikhan hnuaia an training hnuhnung ber chu RG Stadium-ah an nei a. Gift chuan, "Player-te hnenah ṭha taka kan thawh ho avangin lawmthu ka hrilh a, an kal zelna turah duhsakna ka hlan bawk. Mizoram Premier League-ah champion mah ila I League-ah kan chet ṭhat miau loh avangin thutlukna ka siam hi a ngai a, club-in ka ngaihdan min ṭawmpui pawh ka lawm hle," tiin Vanglaini a hrilh.

Season liam ta I League best coach Gift chuan sawi chhunzawmin, "Club thuneitute, Mizo mipui te chungah min ṭawiawmna avangin lawmthu ka sawi a. Hun hlimawm tak hmang ho mah ila football-ah chuan result a pawimawh ber avangin ka kal a ṭul ta a ni," tiin a sawi a, Mizoram nuam a tih thu a sawi tel bawk.

Aizawl FC technical director Hmingthansanga chuan, "Professional takin Gift hian thulukna a siam a, a puitling hle a ni. Coach tawnhriat nei ṭha tak a ni a, club dang hmuh a harsat lo ang," tiin a sawi.

Aizawl FC coach Gift Raikhan-a'n banna a thehluh tur thu a sawi lai hian Khalid Jamil-a'n club enkawl lai a nei lo a, Mizo club-a rawn let a hreh lo mai ni loin a châk zawk.

Amahaherawhchu Pathianni khan Mohun Bagan-in an mualah Real Kashmir 2-1 in an hneh lo a, Mariners hian hemi hma hian NEROCA an hneh tawh loh bawk avangin coach Shankar Lal Chakraborty chuan a hna chawlhsan tur thu a puang ve bawk.

Kolkata club lianin coach an zawng nghal a, Mariners hi an hmelma East Bengal coach hlui Khalid Jamil lamah an ṭuan nghal a, nimin khan an lakluh thu an puang.

Khalid hian Aizawl FC a champion pui hnu khan East Bengal chu Calcutta Football League-ah a champion pui a, I League-ah pahnihna a nih pui bakah Super Cup-ah pahnihna a ni bawk. Red and Gold a zawm hian Khalid hi nuai 125 hlawh niin sawi a ni a, Indian coach zinga hlawh hnem ber a ni a, Bagan pawh hian thlem thlu turin sum an tawktarh hnem ang.

Aizawl FC technical manager Hmingthansanga Zadeng chuan, "Kan beisei chu Khalid-a ni a, a rem tak loah chuan ngaihtuahna kan sen ṭhat leh a ṭul a ni," tiin Vanglaini a hrilh.

Mizo club hian assistant coach atan William Koso an hmang a, Naga coach hi AFC A Licence nei a nih avangin licence thlir chuan Gift Raikhan thlak lailawk thei tur a ni thei a. Amaherawhchu I League match kua khelh hmabak enkawl tur chuan coach dang a nih a rinawm a, tun dinhmunah erawh Mizo club enkawl tur hi a la hriat loh.

Jeje-a'n goal a khung chiah khan India tana Asian Cup-a Mizo goal khung thei hmasa ber a ni nghal. 

Jeje-a'n ram match 53 a khelh aṭangin goal 23 a khung ta chiah a, India tana goal khung hnem lamah  Shabbir Ali (72 matches) a nihrual chiah a, a chungah hian I.M. Vijayan (40 goals, 79 matches), Bhaichung Bhutia (42 goals, 107 matches) leh Sunil Chhetri (67 goals, 105 matches) te chiah a phak lo. 

Sunil Chhetri-a'n goal 67 a khung khan ram tana la inkhel mek player zingah ram tana goal khung tam lamah Lionel Messi (65) a khum a, Cristiano Ronaldo (85) a thlauhna erawh a la tam hle. 

Chhetri-a'n India tan goal khat aia tam a khung tawhna inkhelah Blue Tigers an la tlawm ngai lo.

Asian Cup-ah match khata player pathumin goal an khung theih record chu India hian Sunil Chhetri, Anirudh Thapa leh Jeje hmangin an nihrual a, he record hi kum 1964 khan India vek hian lo siam tawhin Hong Kong lakah Inder Singh, Samajapati leh Chuni Goswami ten an khung. 

India-in 4-1 a Thailand an sawp hi Asian Cup-a hnehna an chan chian ber ṭum a ni. Kum 1964 khan Hong Kong chu 3-1 in an sawp a, hemi kum hian pahnihna an ni. 

Kum 55 hnua Asian Cup-a India-in hnehna an chan leh chian ber ṭum a ni.