Barca-in Messi an nei Real-ah Ronaldo awm tawh lo

Lionel Messi telna Bar­celona-in Pathianni zan khan La Liga hmahruaina belhchhah turin Getafe 2-1 in an hneh. FIFA Club World Cup champion hlim Real Madrid erawh Real Sociedad lakah an tlawm thung. 

La Liga-ah Barcelona-in match 18 khelh zawhah point 40 hmuin hmahruaitu an ni a, anmahni hnaih bertu Atletico Madrid chu Sevilla-in an chelh avangin Catalan club hi point ngain an pha lo. Los Blancos erawh point an hmuh loh avangin an hmelma Barca an phak lohna hi point 10 a ni.

Barcelona-in kum 2019 ṭan nana an match hmasa berah Coliseum Alfonso Perez an tlawh a, inkhelh hmain an khingpui Getafe tlarhnung khauh ṭha tak chuan fak a hlawh hle.

Kum thar a nih angin tu nge kum 2019-ah Barca tan goal khung hmasa ber tih zawhna chhanna chu mipui tam zawk rin ang ngeiin Lionel Messi a ni a, Argentine forward hian minute 20-naah Arthur pass per chu um lutin goal hmahruai khung nan a hmang. Kum 31 mi Messi hian kum li chhung chu club tana kum thara khung hmasa ber a ni tawh a ni.

Minute 39-naah Messi chuan freekick petin Getafe player Djene tauh chhuah chu Luis Suarez-a'n volley let nghalin kawh zetin goal-ah lut a, goal class sang a tling pha. Barcelona tan player ṭha pahnihin goal an khung a, thil thlen zui dan erawh beisei loh lam daih a ni.

Getafe-in tlarhnung an rum ṭhaih a, goal chance ṭha pawh neiin goal ban hial an tih per hnuah Jaime Mata chuan minute 43-naah siphurh a sut ṭhen. Second half-ah pawh mualneitu lamin an nawr na chhunzawm a, chance ṭha an neih zingah Jaime Mata hlah chu a langsar ber a ni a, Getafe forward hian keeper a bum vek hnuah crossbar chungah a pet.

Barcelona-in pawhin khung belh theihna tur hun ṭha chu an nei tho a, Messi-a'n hnai tak aṭangin keeper zawnah chiah a pet a, goal khung belh thei lo mah se goal an chhuah belh bik chuang loh avangin point thum hlu tak an hlawh chhuak.

Real Madrid-in manager Zinedine Zidane leh star player Cristiano Ronaldo an chan hnuah chak leh chak loh a inzat thuak a, manager Julen Lopetegui hoin bul an ṭan fuh lo. Spanish manager Lopetegui hi an ban hnuah Santiago Solari hoin che ṭha mah se ani pawh hi an dah nghet hnuah eng ruai a ni bik lo.

Los Blancos hian FIFA Club World Cup an champion hnuah Villarreal nen an inhnehtawk a, Real Sociedad an hneh loh zui avangin league champion theih dan kawng a zim ta hle. Real hian mamawh hun taka goal khung thei Ronaldo an nei tawh lo a, Karim Benzema leh Gareth Bale ten Juventus zawm ta Portugal captain ai a awh zo lo.

Real Sociedad an mikhual ṭum hian Willian Jose chuan minute thumna lekah penalty aṭangin a khung a, Real Madrid tan thawhchhuahna hun a awm ṭha hle. Solari hote hian inkhel thununin na takin nawr mah se goal an khung thei lo a, Brazilian rawlthar Vinicius Junior-a'n a theihna sang tak a pholang chungin goal hmaah a la special tawk lo.

Minute 83-naah Ruben Pardo chuan Real Sociedad tan a khung belh a, hemi hma hian Real Madrid winger Lucas Vazquez chu hnawhchhuah a nih tawh bawk avangin Los Blancos an tho chhuak thei lo a, 2-0 in an mualpho.

Real Madrid manager Solari chuan, "Kan tana ṭha lo tur zelin thil a thleng. Inkhelh ṭantirha kan penalty chawi siam ṭha turin goal khung theihna tur hunṭha kan ngah a, kan khung thei tlat lo. Penalty tur chiang a ngaih pek kan ni lo a, VAR kan hmang tawh nachungin en let sak kan ni lo. Mihring kan nih angin kan tisual thei a, amaherawhchu an en let duh lo erawh hriatthiam har," tiin an vanduai thu a sawi.

La Liga champion tura Barcelona elpui chu point hmuh dan aṭanga thlir chuan Real Madrid ni loin Atletico Madrid leh Sevilla tiin a sawi theih a, kartawp khan pahnihna leh pathumna hi an inhnehtawk.

Sevilla-in Wissam Ben Yed­der hmangin minute 35-naah hma an hruai a, Atletico lamin Antoine Griezmann hmangin first half tawp hma hretin an sut a, goal dang luh belh loin 1-1 in inkhel a tawp.

La Liga-ah team hrang hrangin match 18 an khel tawh a, tun kartawpah season khata an khelh tur zat chanve (match 19) an khel chiah ang.