Pakhat zawk beiseina a tawp dawn? Manchester City vs Arsenal
Premier League champion nih tum Manchester City leh Arsenal te Pathianni zan dar 9:30 hian Etihad Stadium-ah an inhmachhawn dawn. December chauh la ni mah se kartawp inkhelah Chelsea-in hnehna an chang a nih chuan City leh Gunners inkhela a chak lo zawk tan champion kalkawng a zim tawh dawn.
Chelsea-in point 40 hmuin hma an hruai mek a, an hnuaiah hian Liverpool (34) leh Arsenal (34) an awm. Pep Guardiola nauten Blues an phak lohna chu point sarih a ni a - chak loh a thiang tawh lo.
Mumal lo City
Barcelona manager hlui Guar-diola-a'n City a enkawl hnuah match 26 a khelh pui tawh a, starting XI mumal a la nei thei lo. League match 16 an khelh tawhah ṭum 15 zet chu starting XI hran a nei a, a elpui manager dang 19 aiin a naute a siksawi nasa ber - Pep hian a naute ṭhat dan ber a la hmuchhuak lo tihna a ni!
Man City hian September 17 hnua a vawi khat nan Nilaini zan khan Etihad Stadium-ah hnehna an chang, an mikhual Watford 2-0 in an hneh. City hian an record duhawm lo an thaibo avangin an lawm ang a, an lawm kim lohna chu midfielder Ilkay Gundogan inhiam kha a ni ang. Germany international Gundogan hi khup na vangin an chhawr thei dawn lo a, striker rin-rawl Sergio Aguero bakah Fer-nandinho te chu hrem an ni bawk.
Season hmasa khan City hian league match bikah Arsenal lakah hnehna an chang miah lo, an khelmualah 2-2 a inhnehtawkin Emirates Stadium-ah 2-1 in an tlawm. Tun season-ah a vawi khat nan an intawng dawn a, hnehna chang hlim City hi an boruak ṭhat lai ni mah se chak lo hlim Arsenal lo mikhual hi thil chakawm tak a ni lo tawp ang.
A bul a ṭangin
Arsene Wenger-a nauten league match 14 chhung chak loh nei loa an kaltluang lai chu Goodison Park-ah Everton-in 2-1 in an lo tihtawp sak. Season ṭan nia Liverpool 4-3 a hneh lotu Gunners hian a bul aṭangin an ṭan ṭhat leh a ngai dawn a, chak loh rilru hnual laia Etihad Stadium lama zin hi an ṭawngṭai chhanna a ni bik lo ang.
Arsenal hian malpui hliam vangin Shkodran Mustafi an la chhawr thei dawn lo. Germany international defender hmun ruak luah tur hian Gabriel Paulista an nei a, ani hi Everton lakah beisei angin a khel ṭha tawk lo. Hliam dam hlim Hector Bellerin-a'n inkhel bul a ṭan thei dawn a, a zawna legaue match sarih chhung clean sheet nei thei tawh lo Gunners tan an tlarhnung rem khawm fuh dan tur ngaihtuah hi hna pawimawh berte zinga mi a ni.
Everton an hneh loh hlimin Wenger-a'n, "Kan insiamṭhat nghal a ngai. Tun hma lama khualmuala kan hlauhawmna ang kha kan neih let leh a ngai," a ti. French manager hian league nomawi a duh takzet a nih chuan season harsa leh a zawna inkhelh tam hun lai tak hian a elpui lakah hnehna a chan theih a ngai.
Wenger vs Pep
Manager mahni thuduh leh fing tak pahnih hi tun hmain vawi riat an lo intawng tawh. Heng an intawn tawhnaah hian Wenger hian Arsenal a enkawl vek a, ṭum hnih hneh-na a chang. Hetihlai hian Guar-diola hian Barcelona leh Bayern Munich a enkawl a,
ṭum li hnehna a chang thung, vawi hnih dang chu an inhnehtawk - tun ṭum hi Premier League-a an intawn vawi khatna tur a ni.