Marseille an tla

Pathianni zan khan French Cup round of 32-ah beisei loh result kan hmu, season hmasa Europa League finalist Marseille chu fourth division An­drezieux lakah 2-0 a tlawm­in an zinkawng a tawp.

Andrezieux khelmual Envol Stadium-ah mipui 5,000 chauh an leng a, stadium a tet em avangin French Cup khelh nan a tling lo; hei vang hian St-Etienne khelmual hawhin mikhual an thleng a, Bryan-Clovis Ngwabije leh Florian Milla te goal hmangin hnehna an chang.

Ligue 1 club Marseille hi tun hnaiah an khel fuh hleithei lo, inelna hrang hrangah a zawnin match sarih chhung chu chak ni hmel an hmu ta lo. Coach Rudi Garcia chuan Europa League bakah French Cup aṭanga hma taka an tla mai chu pawm thiam harsa a tih thu a sawi.

Rudi Garcia chuan, "Andrezieux khan hnehna chan an phu, minute 90 chhung khan football hi thawhhona ṭha hmanga ṭha taka khelh theih a nihzia an lantir a ni, chutihrualin kan hun ṭha neih kan chhawr theih loh avang erawh chuan kan vanduai ve bawk a ni," a ti.

Inkhel dangah foot­baller manto ber Neymar chuan Paris Saint-Germain tan a match 50-na khelin goal khat a khung a, a club hi Pontivy GSI lakah 4-0 a hnehna chanpuiin an nomawi kawl lai humhim turin bul an ṭan fuh hle.

Champion lai PSG tan Neymar bakah Kylian Mbappe leh Julian Drax­ler ten goal khat ve ve an khung a, an goal hmasa ber hi Sylvain Jule-a'n anmahni lama a tih luh a ni thung.