China club an che leh ṭan ta!
January transfer bazar in hawn a hnai a, thawm nei ring ber chu Chinese Super League an ni leh der tawh! Hmun dang ang lo takin CSL hi February emaw March thlaah khelh ṭan a ni ṭhin a, November emaw December-ah season a tawp ṭhin. CSL 2016 khelh zawh a ni tawh a, Brazilian coach ropui Luiz Felipe Scolari enkawl Guangzhou Evergrande Taobao an champion.
CSL club ten season an hman zawh tawh avangin rilru an senna ber chu transfer bazar a ni leh tawh a, kumin January bazar-a pound maktaduai 200 chuang sengtu league club te hian Europe lam hawiin player an zawng mek - tun dinhmuna langsar ber chu Chelsea midfielder Oscra a ni.
A sang lua
Chelsea boss hlui Andre Villas-Boas enkawl Shanghai SIPG chuan Oscar lakluh an tum a, Brazilian midfielder man zat tur hi pound maktaduai 50 bawr vel nia tarlan ni mah se pound maktaduai 60 nia tarlan a ni leh tawh! Brazilian midfielder hian China-a kal turin tih tur ngai 90% chu tihfel a nih tawh thu a sawi a, kar khatah £400,000 a hlawh ang - a chunga leng chu Cristiano Ronaldo leh Lionel Messi chiah an ni.
Chelsea boss Antonio Conte meuh pawhin, "Oscar dinhmun hi chu ni rei lo teah a chiang ang," tiin a sawi tawh a, Jose Mourinho fachuam ṭhin hian China lam hi a pan ngei a rinawm ta hle.
Hming langsar
Sunderland boss hlui Gus Poyet-a enkawl Shanghai Shenhua chuan Manchester United leh Man-chester City forward hlui Car-los Tevez lakluh an duh a, Boca Juniors striker hi kum khatah pound maktaduai 31.5 hlawhtir an inhuam! Argentina international hian CSL a pan a nih chuan kar khatah £605,000 a hlawh dawn tihna a ni.
French football magazine lar France Football chuan Paris St-Germain striker Edinson Cavani chuan kai thar Tianjin Quanjian a zawm dawn niin an tarlang a, Italy defender hlui Fabio Cannavaro-a enkawl team hian Uruguayan striker manah hian pound mak-taduai 41.79 thehchhuah an inhuam bakah kum khatah pound maktaduai 16.7 hlawhtir an inhuam niin an tarlang bawk.
Khawi aṭangin nge?
CSL club ten heti zat sum an sen theih chhan hi an ram President Xi Jinping vang a ni. China president hi foootball fan ruhkawl a ni a, kum 2050-ah chuan China hi football powerhouse ni a, World champion nih tir a duh. Xi Jinping-a ruahmanna ang chuan China sports economy hi kum 10 (2015-2025) chhungin pound maktaduai 609 hu nihtir a ni a, kum 2017-ah football school 20,000 tal neih hmana, player 100,000 vel chher chhuah a duh!
An ram president ber a tui miau avangin Chinese sumdawng hausa ten football khawvel an luhchilh a, sum an in sen hnem siak a ni ber mai! Kumin January transfer-ah khan transfer record chu ni 10 chhungin vawi thum ngawt a danglam hman. Jiangsu Suning-in Asia player manto ber tura pound maktaduai 25 man Ramires an lei hnu lawkah Guangzhou Evergrande-in he record hi khumin Jackson Martinez chu Atletico Madrid aṭangin pound maktaduai 31-in an lalut.
Jiangsu Suning bawkin record an siam leh a, Shakhtar Donetsk Brazilian midfielder Alex Teixeira chu pound maktaduai 38.4-in an lalut ve leh. Tun dinhmuna Asia player manto ber erawh Hulk a ni a, Shanghai SIPG chuan Zenit St Petersburg forward hi pound maktaduai 46.1-in nipui transfer-ah khan an lalut a ni.