Eric Bailly hliam a na lo

Crystal Palace laka 2-1 a hnehna an chan ṭuma inhliam Manchester United defender Eric Bailly chuan a hliam chu a serious loh thu a sawi. Villarreal defender hlui chuan, "Hliam na tak a ni lo hlauh a, ka lo kir leh thuai ka beisei," tiin twitter lamah a tarlang. United hian zanin dar 11:30-ah West Brom chu khualmualah an lenchilh dawn a, hmahruaitu Chelsea nena point 13-a inthlau mek Red Devils tan Ivorian defender hi a inlan theih a la beiseiawm loh.

United boss Mourinho chuan an hmabak thlirlawkin, "Table chung lama awm team te nen inel tur khawpin hna kan thawk ṭha tawk a ni. Kan vanduaina chu kan khelh ṭhat niah pawh point kan hloh leh ṭhin a, kan khelmuala kan draw game te kha thlir ila chak kan phu ṭhin. Tuna kan tih theih chu hmasawn zel a ni a, zawi zawiin an chunglam kan pan zel ang. Kum thar hmain match thum kan la khel dawn a, hei hian kan dinhmun thui tak a hril dawn a ni," tiin a inpeih hle.