Europe vs Asia Chungnun inchuhna Real vs Kashima

Pathianni tlai dar 4:00-ah FIFA Club World Cup final khelh a ni dawn a, Champions League champion lai Real Madrid leh inelna thlengtu Japan champion Kashima Antlers te an inhmachhawn dawn - Real in khawvela club ṭha ber nih ngei tumin an khel ang a, football khawvela Asia nep loh zia pholang turin Kashima-in an khel thung ang.

Final kalkawng

Club World Cup-ah khaw-mual tin champion leh inelna thlengtu ram league champion te an intum kual ṭhin a, FIFA Club World Cup thlengtu J1 League champion Kashima Antlers hian playoff aṭangin bul an ṭan. Japanese club hian OFC Champions League champion Auckland City hnehin bul an ṭan a, quarterfinal-ah CAF Champions League champion Mamelodi Sundowns an hneh leh bawk.

Semifinal-ah Kashima-in Copa Libertadores champion Atletico Nacional an hma-chhawn a, South American champion lakah rin hlawh lo zawk ni mah se 3-0 in an sawp a, khawvela football club ṭha ber dinhmun luah turin Real chiah an hmachhawn a ngai ta.

Europe champion an nih avangin Real Madrid-in semifinal aṭangin bul an ṭan a, CONCACAF Champions League champion America chu harsatna nei loin Cristiano Ronaldo leh Karim Benzema hmangin 2-0 in an hneh.

Ramos inlan dawn

Spanish club Real captain Sergio Ramos-a'n Japan an pan hmaa an league match hnuhnung ber aṭangin a tihrawlah hliam a nei a, Club World Cup semifinal a khel thei lo. Mahse, injury time-a chakna goal khung thei tak defender hian, "Pathianniah Real tan ka inlan theih ka beisei," tiin a sawi a, Pathianni zanah a inlan a nih pawn a mak lo ang.

Real Madrid coach Zinedine Zidane chuan, "Kan tum ber chu Club World Cup nomawi chawi a ni a, ka player-te an phur em em bawk. Tuna kan rilru luahtu awmchhun chu he nomawi chawi hi a ni," a ti a, Japanese club lakah an theihna zawng zawngin khelh an tum dawn.

I hriat ngai loh Kashima

Real Madrid chanchin sawi nawn a ngai lo a, Kashima Antlers erawh Real te nen huang khata dah chi an ni lo. Japanese football-ah erawh Kashima Antlers an chungnung a, J1 League kum 24 khelh a nih chhungin Yokohama F. Marinos nen chiah division hniam lama la relegate lo awmchhun an ni.

J1 League-ah vawi riat cham-pion tawhin an ram chan-china champion ngun ber an ni a, kum 2000 khan ram chhung inelnaah champion vekin Japanese club zinga domestic treble champion ni thei hmasa ber an ni. Kashima Antlers-in khawvel hriat an hlawh
ṭanna chu kum 1991 niin Brazil legend Zico-a'n a zawm a, season thum chhungin goal 45 a khung sak a, kum 1999 khan manager ni turin a zawm bawk.

Brazilian player langsar zinga mi Jorginho leh Leonardo te khan Japanese club tan hian an lo khel tawh bawk a, Asian club zinga Club World Cup final lut thei hmasa ber an ni.