Lewandowski-a'n Bayern a duh ber - Ancelotti

Carlo Ancelotti chuan a striker duhlai Robert Lewan-dowski chuan Champions League nomawi kawltu Real Madrid aiin Bayern Munich tana khelh zel a duh thu a sawi chhuak.

Kum 28-a upa Lewandowski hian Thawhlehni khan Bayern tan contract thar a ziak a, German champion tan hian kum 2021 thleng a khel ang. Tun hnaiah Spanish club lian Real hian Poland international hi lakluh an duh nia sawi a ni a, contract thar a ziah takah chuan lakchhuah theih a nih hmel rih lo hle.

Italian manager Ancelotti chuan, "Engtiang chiahin nge Real Ma-drid khan lakluh an duh chiah ka hre lo a, tuna thil ka hriat chian erawh chu Lewandowski hian Bayern tana khelh hi a duhin nuam a ti ber tih zawng a ni," tiin a sawi.

Lewandowski hian kum 2014 khan Borussia Dortmund aṭangin Bayern hi a zawm a, Bundesliga nomawi vawi hnih a chawi pui tawh. Contract thar a ziah hnuah Lewandowski chuan, "He club hian ka duh leh mamawh zawng zawng min pe a, he hmunah hian ka hlim a ni," tiin Facebook-ah a tarlang tawh.

Bundesliga hmahruaitu Bayern Munich hian Pathianni zan dar 8:00-ah league match khel turin Darmstadt an lenchilh ang.