Thla thum hnuah Genoa chak

September 11 khan Genoa leh Fiorentina ten Serie A match an khel a, ruah leh rial tla nasa vangin minute 28-naah tihtawp a ni. Ningani zan khan khelh chhunzawm a ni a, Serbia international Darko Lazovic goal khat khung hmangin Genoa hian 1-0 in hnehna an chang.

Fiorentina hian Europa League an khelh avangin an inkhelh chhunzawm hun hi nghah rei a ngaih phah. Serie A dan leh hrai angin inkhelh hi tihtawp a nih laia an awmdan ang khan chhunzawm tur a ni a, minute 27 leh second 30 aṭanga khelh chhunzawm niin Mattia Perin-a'n goal-kick aṭangin inkhel bul a ṭan.

Serie A match 16 khelh tawh aṭangin Genoa hian point 23 hmuin league table-ah 10-naah an inhlangkai a, chak lo Fiorentina erawh point 26 hmuin an dinhmun ngai pasarihnaah an awm chhunzawm.