Roma tan Juve hnaih theihna hun

Zanin dar 1:15 hian Italian Serie A inkhel pawimawh a awm dawn. League hmahruaitu Juventus khel-mualah an hnuai chiaha awm AS Roma an lenglut dawn a, team pahnihte inthlauhna hi point li chiah a ni.

Juventus goalkeeper Gianluigi Buffon-a'n an tan Roma chu nomawi chhuhsak thei khawpa hnawk an nih thu a lo sawi tawh. Italian league-a player tawnhriat ngah berte zinga mi thusawi hi Juve manager Massimiliano Allegri tan pawh ngaihthah chi a ni lo ang.

Roma coach Luciano Spalletti chuan, "Nomawi kan inchuh pui nen kan inhmachhawn dawn a ni a, a tir a ṭanga a tawp thlengin kan inthlahdah thiang lo ang. Player ṭha tak tak awmkhawmna ni mah se ka naute an ṭha tawk ve tho a, kan zam lo. Chak tumin kan hmachhawn ang," a ti.

Season hmasa khan Roma hian season bul an ṭan fuh zawk a, match hmasa 12 an khelh zawh khan hmahruaitu an ni. Mahse, season laihawlah Roma an tlahniam a, an elpui Juventus an sang tual tual thung. February thla a thlen meuh chuan Juve leh Napoli te chiah champion theia ngaih an ni tawh, kuminah chuan Spalletti hian kum hmasa lama an chetsual tawhna siamṭhat a tum hle.

Roma hian hliam vangin Mohamed Salah an la chhawr thei dawn lo a, an match hnuhnung berah AC Milan an hneh ṭuma hliam tuar Bruno Peres a la dam lo bawk. Arsenal aṭanga loan hmanga an hawh mek keeper Wojciech Szczesny hi tun hnaiah innghahna tlak khawpin a khel ṭha.

Juve manager Allegri tan player thlan chungchangah harsatna tur a awm dawn lo. Defender Dani Alves leh Leonardo Bonucci te hliam vangin a chhawr thei dawn loh tih loh chu harsatna nei dang an awm lo. Tlarhmaah Gonzalo Higuain thachhang dawl turin Paulo Dybala a nei a, tun hnaia khelṭha tak Mario Mandzukic a la awm cheuh bawk.

Italian club lian pahnihte hi tum hmain vawi 164 an lo inhmachhawn tawh a, Juve hi record nei ṭha zawk niin vawi 78 an chak. Roma hian vawi 38 hnehna changin ṭum 48 dang chu an inhnehtawk thung.