Chanmari leh BVT-in MPL mimal lawmman insem

Mizoram Premier League Season 5-a position tina player ṭha ber chu nizan khan Lammualah puanchhuah a ni ta a, Chanmari leh Bethlehem Vengthlang player pahnih ve vein chawimawina an dawng.

BVT-in tlarhnung lam hauhin best goal­keeper-ah Malsawmdawngzela thlan a ni a, best defender-ah H. Lalhlimpuia thlan a ni bawk. Chanmari FC forward Malsawmfela chu best forward-ah thlan a ni a, Lalruatfela Zote chu best midfielder-ah thlan a ni. Mimal lawmman dawngtute hian Rs 5,000 bakah smartphone Gionee F103 Pro an dawng.

Best Goalkeeper : Malsawmdawngzela, BVT

MPL season hmasa paliah Aizawl Venglai tlangval Lalawmpuia chu best keeper-ah thlan a ni a, BVT keeper Mala hi Aizawl FC keeper AwP-a tih loa best keeper dawng thei hmasa ber a ni.

BVT keeper Malsawmdawngzela hi match 16-ah a inlan a, Round 14-ah an awltir tih loh chu a inlan vek. Khawzawl tlangval Mala hian goal 11 chhuahin clean sheet vawi kua a nei bawk a, MPL5 goalkeeper zingah clean sheet ngah ber a ni.

Best keeper nominee-ah Mala bakah Zo­than­mawia (Aizawl FC), Lalruatpuia (Chanmari West), Liansangpuia (Ramhlun North) leh MS Dawngliana (Chanmari FC) te an awm.

Best Defender : H. Lalhlimpuia, BVT

Lunglei tlangval H. Lalhlimpuia hi MPL5-a Bethlehem VT match zawng zawngah a inlan kim vek a, a khel tluan vek a, ṭum hnih man of the match-ah thlan a ni. Lalbiaksanga Colney hoten final an thlen theihna kawngah ani aia pawimawh an awm chuang lo. Round 2-a Chanmari West an lehthal ṭumin Lalhlima hian goal hnih a khung bawk.

Best defender nominee-ah Lalhlima bakah Emma Chigozie (Chhinga Veng), Lalramchullova (Aizawl FC), Lalrinchhana Tochhawng (Chanmari FC) leh Vanlalzuia Hnamte (Chanmari West) te an awm.

Best Midfielder : Lalruatfela Zote, CFC

Republic Vengthlang tlangval Lalruatfela Zote hian MPL5-ah goal thum a khung a, tun season-ah forward position-ah inlan tam zawk mah se midfielder a nih tho avangin best midfielder nominee-ah dah a ni a, a vanneih pui bawk. Fela Zote hian league round tawp lamah chhungkaw lam harsatna vangin match hnih khel lo mah se semifinal-a inkhel bul a ṭan leh meuh chuan Chanmari thahrui pawimawh a ni tih a pholang nawn a, final an thlen theihna kawnga player pawimawh a ni.

Best midfielder nominee-ah hian Fela Zote bakah K. Lalnunzama (Chanmari West), Lalrinchhana (Chanmari FC), Zosangkima (Bethlehem VT) leh Zosangliana (Ramhlun North) te an awm.

Best Forward : Malsawmfela, CFC

Malsawmfela'n tun season-ah Chanmari goal khung khawl a ni a, Republic Veng tlangval F. Lalrinpuia hnua best forward chawimawina vawi hnih dawng thei hmasa ber a ni. Ramhlun South tlangval hi MPL3-ah best forward atana thlan a ni tawh a, MPL tihmuhnawmtu pakhat niin MPL5-a goal 100-na khungtu a ni bawk. Sawmfela hian tun season-ah goal 11 a khung a, MPL season nga chhungin goal 29 a khung.

Best forward-ah hian Sawmfela bak­ah Laldampuia (Chanmari West), Lalram­muanpuia (Bethlehem VT), Michael Lalrem­ruata (Dinthar FC) leh R. Laldanmawia (Chanmari West) te an awm.