United chakna Ibrahimovic

Manchester United-in Zlatan Ibrahimovic goal hnih hmangin Hawthorns-ah West Brom 2-0 in an hneh a, Jose Mourinho ho-ten Premier League match riat chhung hneh loh an tawng tawh lo.

Inkhelh banah Portuguese manager Mourinho thupek ang-in United player-ten an fan-te hnen-ah krismas thilpek atan an jersey an pe. Inkhel dangah Leicester City-in player 10-a khel chungin Stoke City chu khual-mualah an draw a, West Ham-in captain Mark Noble-a pe-nal-ty hmangin Hull City an hneh.

Sunderland-in table mawng-phah chhuahsan turin Patrick van Aanholt-a goal hmangin Watford 1-0 in an hneh a, Middlesbrough-in an mualah Swansea 3-0 in an sawp bawk.

Zlatan = Superman

Zlatan Ibrahimovic-a'n Uni-ted manager Mourinho duh-sakna a dawng a, kum 35-a upa a ni tawh nachungin Premier League match 16-ah inlan tawhin match khat chiah a awl a, a khelh loh ṭum pawh hi hrem vang chauha inlan lo a ni.

Inrinni zanah United forward Ibra hian minute ngana lekah Jesse Lingard cross ṭha bik chu a tauh goal a, Swede forward hian minute 56-naah a thiamna pholangin chak nemnghehna a khung.

Hawthorns-a goal hnih khung-tu Ibrahimovic hian tun season-ah goal 16 a khung a, chung zinga goal 10 chu match hnuhnung pakuaa lut a ni. League bikah Ibra hian goal 11 khung tawhin United top scorer a ni mek.

United manager Jose Mou-rinho chuan, "Superman ang mai a ni. A khel ṭha takzet a, ka tum dan chuan Europa League-ah hahchawlhtir deuh ka tum a, amaherawhchu match hmasa bera Feyenoord kan hneh loh avangin dinhmun harsaah ka awm a, loh theih loin ka luhtir a ṭul ta a ni," tiin Ibra khelh tam chhan a sawi.

Swede striker chungchang sawi chhunzawmin Mourinho chuan, "Goal a khung loh ṭum pawhin Zlatan hi kan tan a pawimawh a, chuvangin kan chhawr thiam hi a ṭul hle. Defender tan chuan kum upat hnuah pawh ṭha takin a khelh theih a, striker-ah chuan thup theih loh chin a awm. Hei vang hian a dinhmun hi kan sawi dun nasa a, tun dinhmunah chuan inkhel turin a inpeih hle," tiin duat bik a ṭul thu a sawi.

West Brom an hmachhawn ṭumin Ibrahimovic hi a vannei tel a, Baggies defender Craig Dawson laka a chet danah red card pek theih ni mah se yellow card chiah a hmu.

Manchester United hian bo-xing day-ah an manager hlui David Moyes-a kaihhruai Sunderland an mikhual dawn a, West Brom-in Emirates Stadium-ah Arsenal an tlawh thung ang.

Foxes an huaisen

Leicester City forward Jamie Vardy chu minute 28-na lekah Stoke City player Mame Diouf a tlawh avangin referee Craig Pawson-a'n hnawt chhuak mah se Pre-mier League champion laiin khual-mualah point an sual chho tho.

Stoke City-in an tamna hmang ṭangkai zuiin Bojan Krkic leh Joe Allen te goal hmangin 2-0 in hma an hruai a, Leicester-in substitute Leonardo Ulloa leh Daniel Amartey te hmangin an siphurh an sut.

Leicester City manager Claudio Ranieri chuan, "Kan rilru puthmang a dik a, hun tawp thlengin theihtawp kan chhuah a ni. Halftime-ah ka player-te ka fuih nasa a, a êng zawngin kan thlir a, kan chhunzawm zel theih ka beisei," tiin a player-te khelh dana a lungawi thu a sawi.