Chanmarians-in final an lut

Mahuma Memorial Cricket Tournament khelh meka final lut hmasa ber chu Chanmarians an ni. League match hnuhnung berah Chanmarians hi Chhinga Veng lakah tawlh thlu ve zeuh mah se an insiamṭha lehnghal tih an lantir a, final lut tur hian Zarkawt Lords chu run 32-in an hneh.

Suaka Memorial Cricket Ground, Sihhmuia inkhelah hian Chanmarians an bat hmasa zawk a, over 40-ah wicket sarih hlohin run 180 tehmeuh an vaw chhuak. President's Cup champion lai Chanmarians tan opener Lalhmangaiha'n run 26 siamin bul a ṭan ṭha viau a, run 55 siamtu a opening partner Lalhruaizela'n Zarkawt bowler-te a chhaih mangang viau bawk - a tawp lamah Chanmarians an zuih dawn nia a lan laia run 33 siamtu K. Lalṭhazuala hming lam hmaih a thiang lo.

Zarkawt Lords lamin target huphurhawm tak an nei tih inhre mah se final luh ngei tumin an khel a, Lalrempuia (57 runs) leh Zothlamuana (21 runs) ten Zarkawt tan beiseina sang tak an rawn siamsak. Mahse, Zarkawt an harh rei lo, Chanmarians zawk an talbuai dawn emaw tih laiin bowler Lalmuanzuala a rawn inlar a, run 26 chauh pe a wicket 4 li lain Zarkawt Lords ten an ngam lo hle - over 38 ah run 148 siama out vekin semifinal chinah an tawp a ngai ta a ni.

Vawiin chawhma dar 9:15-ah semifinal dang khelh chhunzawm a ni dawn a, Chhinga Veng leh Kulikawn an inhmachhawn ang. Team pahnih inhmachhawna chak zawkin final-ah 1st Division champion nih tumin Chanmarians an hmachhawn dawn a, final hi Nilainiah khelh tur a ni ang.