Juventus chakna Higuain goal ropui
Gonzalo Higuain-a'n mi-nu-te 14-naah goal ropui a khung a, Inrinni zan Serie A inkhel pawimawhah league hmahruaitu Juventus chuan anmahni hnaih bertu AS Roma chu 1-0 in an hneh.
Juventus hian an khelmualah a zawnin league match 25 chhung chu hnehna an chang ta a, kum 2013 August - 2014 November inkara record an lo siam tawh chu an nihrual chiah. Tun season league match 17 khelh aṭanga point 42 hmuin Roma aiin point sarihin an sang fal tawh.
Higuain-a goal
Juventus stadium-a inkhel-ah club pahnih an inhlau lo a, goal khung tumin an innawr nghal. Juve hmatawng Mario Man-dzukic leh Higuain ten Roma tlarhnung an rumṭhaih nghal a, keeper Wojciech Szczes-ny hna an siamsak nghal deuh reng.
Minute 14-na a ni a, Argen-tina international Higuain chuan chak tak ball tlan luh puiin Daniele de Rossi leh Kostas Manolas te a paltlang hnuah yard 18 a hla aṭangin goal kilah a hlap lut. Arsenal aṭanga loan hmanga an hawh Szczesny tan tih theih a awm lo - Real Madrid leh Napoli striker hlui goal khung hi goal ropui a tling.
Roma-in siphurh sut tumin na takin nawr let ṭhin mah se Juve ban rinawm Gianluigi Buffon a rinawm tlat. Italy international goalkeeper hian Roma goal khung tur chu
ṭha zetin vawi hnih a dan sak, hun tawp thlengin goal dang a lut lo. Team pahih danglamna chu khawvela player manto pathumna Higuain-a'n tun season-a a league goal 10-na a khung kha a ni.
Juventus hian Roma an mikhual hnuhnung vawi ruk-ah hnehna an chang vek a, goal thum chiah an chhuah. Roma hi tun season kal mekah khualmualah vawi li an tlawm tawh a, season hmasa pumpuia khualmuala an chak lo zat aiin match khatin a tam tawh!
Eng nge an sawi?
Roma coach Luciano Spal-letti chuan, "Juventus-in hnehna an chan tak avangin an tan league thununtu nih chhunzawm a harsa tawh lo ang. Chutihrualin kan beidawng dawn bik lo a, a tawp thlengin kan theihtawpin kan bei zui zel dawn a ni. Ka nau ten theih tawp chhuah mah se team pumpui thlirin player te theihna a insan hleih deuh avangin kan tan a harsa," tiin Roma aiin Juve chuan player an nei ṭha zawk tih a pha lo.
Juventus manager Massimi-liano Allegri chuan, "Point sariha kan san tak avangin a lawmawm a, hnehna kan chan avangin ka lawm bawk. Chutihrualin ka naute theihna sanzia ka hria a, kha aia ṭha zawka khel chhuak thei tur kha kan ni. Inkhel kan thunun a, goal tam zawk khung kan phu," a ti.
Inkhel dang
Inrinni zan Serie A inkhel dang-ah table-a pathumna AC Milan chuan an mikhual Atalanta chu goal awm loin an inhnehtawkpui a, Empoli chuan relegation zone aṭanga point nga a him turin Cagliari 2-0 in an hneh ve bawk.
AC Milan boss Vincenzo Montella chuan, "Roma nena kan inkar tih zimna hun ṭha bawhpelh mah ila ka naute khelh danah khan lawmna tur ka hmu. Chak duhin kan nawr na hle a, kan vanneih ni chu nise goal kan khung ngei ang. Tun dinhmunah chuan kan awm naah hian ka lawm a, inkhelh hmabak a la tam avangin lungngaihna tur a la ni lo," a ti.
Europe inelna lamah pawh sulhnu nei ṭha tak Milan hi tun hnaiah an tla hniam a, kum 2013-14 season hnuah Champions League an la khel leh lo. Club dinhmun thlirin Montella hian season thara Europa League khelh chu an thil tum hmasa a nih thu a lo sawi tawh.