Atletico Madrid chak ve ta

League match hnuhnung pangaa vawi khat chiah chak hmel la hmu Atletico Madrid chuan an nomawi beiseina chhi nung turin chak hmel an hmu ve leh ta a, Inrinni zan khan Saul Niguez goal ropui hmangin Las Palmas chu 1-0 in an hneh. Diego Simeone-a naute hian khelh khata khel tam zawk chungin hmahruaitu Real Madrid chu point 9 zetin an la thlau tho a, palina Villarreal erawh point khat chauhin an phak lo thung.

Inrinni zan La Liga inkhel dangah Sevilla chuan 4-1 zetin Malaga an sawp. Luciano Vietto chuan minute 25-naah goal hmahruai khungin minute thum hnuah a chhunzawm leh a, Wissam Ben Yedder leh Vitolo ten goal khat ve ve an khung bawk - Sevilla hian minute 11 chhung lekin goal li hi an khung.

Sevilla defender Adil Rami chu minute 61-naah hnawhchhuah ni mah se Malaga-in goal an chhuah hnem hret a, Sandro Ramirez-a'n minute 64-naah goal khat khung ve mah se Malaga tan phurna thar pe tur khawpin a tawk lo.