Australian Open champion tum Djokovic

Tennis world number 1 Novak Djokovic chuan season bul ṭan nan Australian Open nomawi chawi a duh thu a sawi a, title lian hmasa ber tur lak chu a thil tum langsar a nih thu a sawi tel bawk.

Serbian tlangval Djokovic hian season hmasa kha a hmang ṭha hle, Wimbledon leh US Open nomawi chawiin ranking-ah a chung berah a invawrh kai a, season tawp dawn lamah Paris Masters leh ATP Tour Finals-ah a champion zui bawk a ni.

Kum 30 mi Djokovic tan player langsar Rafael Nadal leh Roger Federer te bakah Karen Khachanov, Alexander Zverev leh Roberto Bautista Agut te chu hnawksak phak tura ngaih an ni a, a bik takin hard court huang chhungah kawng a awlsam lo mai thei.

Grand Slam vawi 14 cham­pion tawh Djokovic chuan, "Qatar Open kan khelh kha ka tan chuan fiahna ṭha tak a ni, singles leh doubles huanga ka inlan avangin darkar 10 chhungin set 15 vel ngawt ka khel a, taksa dinhmun enchhin­na hautak tak chu a tling.

"Kar leh mai aṭang chuan set nga kan khelh a ngai leh tawh dawn a, tun hma lama hlawhtlinna ka lo chan va fo tawhna Melbourne-a kan inlan hunah tuna rim taka ka beihna hi a ṭangkai ngei ang ka ring," a ti. Season khat chhunga Grand Slam hmasa berah hian ṭum ruk ngawt a champion tawh.