Khawvela club tha ber Real

Real Madrid chuan khawvela club ṭha ber ni turin FIFA Club World Cup final-ah Japanese club Kashima Antlers chu 4-2 in an hneh. Real hian a zawnin match 37 chhung tlawm hmel an hmu tawh lo a, an club chanchina tlawm loa an kaltluan rei ber ṭum a ni.

Spanish club tan Karim Benzema'n goal hmahruai khungin Cristiano Ronaldo-a'n hattrick a siam a, amaherawh-chu inelna thlengtu Kashima Antlers-in European champion hi extra time an hruai thleng a, Asian club hian starting eleven-ah Japanese player vek an hmang bawk.

J1 League champion Kashima champion zo lo mah se Asian club zinga Club World Cup final lut hmasa ber an ni a, Real Madrid laka an chak loh danah zahna tur a awm lo.

Team huaisen

Europe leh Asian football inthlauhzia sawi nawn a ngai lo a, final khelh ṭan a nih hma hauhin Real chu dahsan zawk an ni. Minute 9-na leka Karim Benzema-a'n goal hmahruai a khung hnu phei chuan Real hi awlsam takin an chak dawn niin a lang. Mahse, team huaisen Kashima-in awlsam taka an muala tlawm an duh lo.

Real tlarhnung talbuai karah Gaku Shibasaki chuan an si phurh sutna goal minute 44-naah a khung a, French defender Raphael Varane tihsual vangah a ngaih theih. Chawlhlawk hman zawh hnuah pawh Spanish club an talbuai chhunzawm. Sergio Ramos tihsual nangchingin Gaku Shibasaki chuan a goal hnihna a khung a, Kashima hma a hruaipui! Mahse, Real-in minute 60-naah Cristiano Ronaldo penalty hmangin an si phurh an sut a, extra time khelh a ni.

Real ropuina Ronaldo

Minute 90 an inhnehtawk hnuah Ronaldo tak tak a inlar ṭan - Portuguese forward hian hun pangngaia vawi tam chance ṭha a hlah tawh chu extra time-ah a chhunzawm lo - goal hnih khungin hattrick a siam a, Yokohama Stadium-ah Ronaldo ropuina belhchhahin a awm.

Real Madrid-in Ronaldo an neih hnuah Club World Cup-ah vawi hnih an champion ta a, inelnaa champion ngun ber erawh Barcelona niin vawi thum an champion. Portugal captain Ronaldo hian Manchester United tana a khelh laiin khawvel pum huap club inelnaah a champion tawh bawk.

Pathumna Nacional

Club World Cup-a pathumna chu Atletico Nacional an ni. Semifinal-a Kashima ngam lotu club hian Club America chu hun pangngaiah goal hnih ve ve khunga an inhnehtawkpui hnuin penalty hmanga chak zawk zawn a ni a, Colombian club hian 4-3 in hnehna an chang.

Nacional hian minute 26 chhungin Samudio (own goal) leh Alejandro Guerra hmangin 2-0 in hma an hruai der tawh a, America-in lehthal tumin Michael Arroyo leh substitute Oribe Peralta penalty hmangin an si phurh sut mah se penalty-ah an vanduai ta tho a ni.