Merseyside Derby Goodison Park-ah a vawi khat nan Klopp

Liverpool leh Everton inhuatna hi sawi nawn ngai a ni lo - Zanin dar 1:30-ah Premier League champion tum Reds-in insiamṭha mek Everton an lenchilh dawn a, Jurgen Klopp-a'n Goodison Park-ah a naute a kaihhruaina hmasa ber tur a nih avangin hriatreng tlak inkhel hnutchhiah a duh ang.

Karius aiah Mignolet

Klopp-a'n Bournemouth leh West Ham laka chesual Loris Karius aiah Simon Mignolet chu Middlesbrough an hneh ṭumin si ban nghaktuah a hmang a, Belgian keeper hi Everton lakah pawh goal vengtu tur a ni.

Liverpool boss chuan, "Kartina player thlak reng ka duh lo. Simon khan Boro lakah ṭha takin goal a veng a, Everton lakah pawh a veng leh ang," tiin pound maktaduai 4.7 man keeper aiah Mignolet a chhawr tur thu a sawi.

Sturridge a dam?

Reds striker Daniel Sturridge-a'n hliam vangin match nga khel tawh lo mah se Everton hmachhawn turin a dam hman beisei a ni a, midfielder Emre Can pawh dam hman tura beisei niin Joel Matip erawh a chiang lo thung.

Klopp chuan, "Sturridge din-hmun hi chiang taka sawi theih a ni lo a, dam hman tura beisei erawh a ni. Minute 20 lek pawh a inlan thei a nih chuan Sturridge a nih miau avangin team tan chanchin lawmawm tak a ni ang," tiin a sawi.

Inkhel pawimawh

Liverpool boss Klopp chuan, "Goodi-son Park-a ka team ka kaihhruaina hmasa ber tur a nih avangin ka tan chuan a danglam bik a, inkhelh hlan ka nghakhlel tawh takzet a ni. Team ṭha tak pahnih kan inhmachhawn dawn a, Everton fan-te reh ṭhiapa an awm theih nana beih hi kan hna tur chu a ni," a ti.

Klopp chuan sawi chhun-zawmin, "Football hi khawvela thil pawimawh ber a ni hauh lo a, mah se Thawh-
ṭanni zana minute 90 chhung chu Liverpool-ah football aia pawimawh a awm lo ang," tiin an inkhel boruak san turzia thiam takin a sawi.