PV Sindhu-i'n Hyderabad chakpui

A khingpuiin match point ṭum hnih a hmuh tawh chu PV Sindhu-i'n huaisen takin a pawt thla a, India nula hian chak lo tura a lan hnuah Kirsty Gilmour hneh letin Hyderabad Hunters chu Ahmedabad Smash Masters lakah 4-3 in hnehna a chanpui.

Pathianni zan Premier Bad­minton League inkhelah Sindhu hian 14-15, 15-12, 14-15 in hnehna a chang a, team pahnih te dinhmun 3-3 a ni chiah. Hyderabad Hunters tan mipa doubles-ah Bodin Isara leh Sa Rang Kim te chuan Satwiksairaj Reddy leh Chun Hei Lee te chu 10-15, 15-11, 14-15 a hnehin 4-3 in an tlang theih phah.

Hyderabad Hunters hian point 21 hmu tawhin hma­hruaitu an ni a, chak lo zawk Ahmedabad erawh paruknaah awmin semifinal khel phak china awm tur chuan thapui an thawh a ngai tawh dawn.

Inkhel dangah team thar Pune 7 Aces chuan pathumna dinhmun luah turin a hniam bera mi Delhi Dashers chu 5-0 ngawtin an sawp. Pune tan Olympic champion Carolina Marin chuan Evgeniya Kosets­kaya 15-5, 15-6 in a hneh.

Zanin dar 7:00 hian inkhel pakhat a awm dawn a, pangana ni lai Bengaluru Raptors leh pahnihna Mumbai Rockets an inhmachhawn ang. PBL league round bik hi January 10-ah khelh zawh tura ruahman niin, ni 13-ah final khelh a ni ang.