Carabao Cup Semifinal first leg Tottenham mualah Chelsea lut dawn

Zanin dar 1:30 hian Carabao Cup semifinal first leg khelh ṭan a ni dawn. Tottenham Hotspur chuan Wembley Stadium-ah Chelsea an mikhual dawn a, naktuk zanah Manchester City leh Burton an intawng zui ve leh bawk ang. January thla tawp lamah second leg khelh a ni leh thung dawn a ni.

London team ṭha pahnih hi inelna hrang hrangah vawi 162 ngawt inhmachhawn tawhin, Blues hian ṭum 68 hnehna changin Spurs lamin vawi 53 hnehna an chang thung - an intawng hnuhnung berah Mauricio Pochettino naute hian 3-1 in hnehna an chang; tun season Premier League bika Maurizio Sarri naute tlawm hmasak ber a ni hial.

"Taksa, rilru, kan khelh dan leh ruahman dan thlengin a fuh lo vel vek," tiin Spurs an ngam loh ṭum hian Sarri a ṭawngchhuak a, Italian manager hian an chak loh aṭanga thla hnih hnuah a naute a remkhawm fuh tawh em tih chu fiahin a awm dawn.

Premier League season kal laia forward hmuhnawm berte zinga mi Son Heung-min chu Asian Cup khelh vangin zaninah a inlan thei dawn lo a, South Korea international awm lo tur hi Tottenham tan channa nasa tak a tling dawn.

Kum 26 mi Son hian an intawn hnuhnung berah pawh hian goal a khung, tun hnaiah khel ṭha zualin Spurs tan a inlan hnuhnung 11-ah hian goal 17 zetah a inrawlh, match hnuhnung 10 aṭangin goal kua ngawt a khung a ni.

Tottenham midfielder Dele Alli chuan Son chungchang sawiin, "Sonny awm lo tur hi player ṭha tak a ni a, khelmual chhung bakah training-na hmuna a chevel hmuh chuan a ṭhat zia hi rinhleh tur a awm lo, ani a awm lo tur hi kan tan channa nasa tak a tling," tiin a sawi.

FA Cup third round-a Tranmere Rovers an sawp ṭumin Son hian goal khat a khung bakah assist vawi hnih a nei bawk a, ani a awm loh takah chuan season bul ṭan fuh tak Lucas Moura chungah mawhphurhna a sang zual dawn. Brazilian player hi August thla EPL Player of the Month a ni tih hriat tel a fuh ang.

Spurs hian EPL season kal laia goal 14 khung tawh Harry Kane an la nei a, England captain bakah tun hnaia khel ṭha Christian Eriksen leh Alli an la awm avangin tlarhma lamah chuan an ngaihtuahawm lo tura ngaih a ni.

Kar hmasa aṭang khan defender Jan Vertonghen leh midfielder Mousa Dembele te chuan training an zawm pangngai leh thei tawh, December thla tir lam aṭanga inlan thei lo hi an rawn kir a nih chuan Poch-a tan tlarhnung lam thuam chakna tura hmanraw ṭha tak an ni ang.

Maurizio Sarri-a'n Napoli a enkawl laiin Juventus a tluk theih loh avangin nomawi a chawi thei lo a, nikum nipui laia Chelsea a pan hnuah erawh club lian dangte elphaka nomawi hlawh chhuak tura beisei a ni.

Italian manager hian a duh leh mamawh ang player chu a la khawm zel. Premier League mai bakah Europa League leh FA Cup-ah pawh a player neih ṭhat a chhawr zel a, insiksawi ve ṭhin mah se an inkhek tluan ngai meuh lo - zaninah pawh an ṭhat theih dan berin an inrem ang.

Thlasik bazarah Chelsea thawm a ring hle, tawnhriat ngah Cesc Fabregas boruak a lian viau a, Spain international hi tun season chhunga chhawr rim a nih loh avangin Spurs lakah chuan nghawng a nei lian lo tura ngaih a ni. Player thar Christian Pulisic erawh tun season chhung chu an la chhawr thei dawn lo.

FA Cup-a Nottingham Forest an hneh ṭumin Alvaro Morata-a'n goal hnih a khung thei a, Spain international hi zaninah a inlan a beiseiawm. Mahse, nikum November thlaa Spurs nen an intawng ṭum khan goal zawna pet a nei miah lo; ṭum thum a offside chu a lansarhna pakhat a ni!

Striker Olivier Giroud (kerek) leh winger Pedro (malpui) hliam te pawh a ṭul a nih chuan chhawr theih an nih a beiseiawm, hetih lai hian Ruben Loftus-Cheek erawh hnungzâng na vangin an chhawr thei dawn lo. 

Nidang ang bawkin Eden Hazard chu Chelsea innghahna a ni leh dawn, Belgium international hi a chang chuan tlarhma laiah dah a ni ṭhin a, zanin hian mual sirah nge a laiah a awm ang tih hriat lawk a ni lo. Midfielder inkawp fuh N'Golo Kante leh Jorginho te tan tlarhnung leh hma lam thlun zawm tum chu an hna a ni leh ang.