Nishikori tan nomawi hmasa

Japan tlangval tennis khel thiam Kei Nishikori chuan tun season chhunga a nomawi hmasa ber a chawi. Pathianni zan khan Nishikori hian Brisbane International final-ah Daniil Medvedev chu 6-4, 3-6, 6-2 in a hneh.

World number 9 Nishikori hian 2016 Feb-ruary thla hnuah nomawi a chawi lehna hmasa ber a ni a, season hmasa khan banrek na vanga a buai avangin a hlawhtling tawk lo a ni.

Kum 29 mi Nishikori chuan, "Bul ka ṭan khat avangin ka khingpui kha pressure ka siamsak thei a, ka tan chuan kum bulṭanna duhawm leh hlu bik tak chu a ni," tiin world number 1 hlui Andy Murray hnehtu Medvedev a hneh dan a sawi.

Nishikori hian inkhel bul a ṭan fuh a, set hmasa ber a lak hnuah set hnihna chu hloh ve mah se, a chak zawk tur zawnna set hnuhnung berah erawh 5-1 ngawta hmahruai falin a chungnung hle.

January 14 aṭanga khelh tur Australian Open thlir zuiin Nishikori chuan, "Nomawi inchuhna inkhel bikah hian chak lo pawh ni ila final ka thleng thei hi ka lawm, chawlhkar khat chhungin player ṭha ka hmachhawn nual a, a tawpa nomawi chawi theih hi lawmawm tak a ni," tiin a sawi.