Senegal tan beiseina la awm

Khelmual chhunga African champion Senegal chuan zanin dar 12:30 hian FIFA World Cup group I match hnuhnung berah Iraq an hmachawn dawn. Sadio Mane telna team hian point la hmu lo mah se Iraq an hneh a nih chuan second round lut theihna kawng a inhawng.

Senegal hian tlarhmaah Nicolas Jackson, Sadio Mané leh Ismaïla Sarr te an nei a, Premier League-a hming chher vek tawh an ni. Midfield-ah Idrissa Gueye awmin tlarhnungah Kalidou Koulibaly leh keeper Édouard Mendy te an awm avangin thui tak thleng thei tura ngaih an ni.

Mahse, tunah erawh Senegal tan second round lut turin Iraq hneh ngei a ngai a, 1-0 a chak erawh ngaih ṭhatna chi a ni lo ang. Tun ṭum inelna kalphungah hi chuan group 12 aṭanga pathumna zinga ti ṭha pariatin second round an lut thei a, pathumna nichunga point li hmu chuan second round an lut chiang.

Hei chauh hi a ni lo a, pathumna zinga point thum hmu tan pawh beiseina sang tak a awm a, goal difference erawh a pawimawh ang. Tunah hian Senegal goal difference hi -3 a ni mek a, Iraq hi goal thum tala an hneh a nih chuan second round lut turin beiseina sang tak an nei thei ang.