Mexico an chak vek

Kumin World Cup thlengtu zinga mi Mexico chuan Ningani zing khan 3-0 in Czech Republic an hneh a, inelna aṭanga an pet chhuah bakah group match an khelh tawhah hnehna an chang vek.

Mexico tan Mateo Chavez, Julian Quinones leh Alvaro Fidalgo ten goal khat ṭheuh an khung a, Czech Republic-in chhanletna tur an nei ve lo.

Estadio Banorte, Mexico-a inkhelah Czech Republic an hlauhawm hmasa zawk a, Denis Višinský chuan chance ṭha vawi hnih a nei nghal a, mahse goal zawnaha pet thei lo. Repre (Czech sawina) hian inkhelh chhung zawngin vawi 12 zet shot nei mah se, goal zawnah vawi khat chiah an pet.

Minute 55-naah Mexico tan Chavez chuan keeper chiah a hmachhawn hnuah, mawi takin an hmahruaina goal a khung a, minute ruk hnu lawkah Quinones chuan buai nuai nuai karah khungin an hmahruaina a belhchhah. Injury time-ah Fidalgo chuan chiang zetin an chak nemnghehna goal a khung zui.

Inkhelh zawhah erawh Guillermo Ochao a langsar a, kum 40 mi Ochoa hian minute 78-naah Raul Rangel chu thlakin inkhel tawp thleng goal a veng. Ochoa hian 'El Tri' tan World Cup vawi ruk a fehchhuahna a ni a, 2006 leh 2010 khan bench-ah ṭhu vek mah se Cristiano Ronaldo leh Lionel Messi te huangah a awm.

Ochoa bakah hian Gilberto Mora chuan record a siam a, kum 17 leh ni 253-a upa niin Mexico tan World Cup a bul ṭan thei naupang ber a ni. World Cup chanchina ram tana bul ṭan thei naupang ber parukna a ni pha bawk.