Beisei la nei Cape Verde leh Saudi Arabia

Kumin World Cup-a ram langsar loa ngaihven hlawh ber zinga mi Cape Verde chuan, group match hnuhnung berah Saudi Arabia an hmachhawn dawn a, team pahnihte hi second ruh la beisei ve ve an nih avangin an inkhel boruak a sang dawn.

A vawi khat nana World Cup khel Cape Verde-in an match hmasa berah khawvel barakhaihin Spain lakah goal chhuah loin an inhnehtawkpui a, an keeper kum 40 mi Vozinha a lar phah hle.

Blue Sharks (Cape Verde) hi an vanneih vanga ngaitu tam mah se, Uruguay chu 2-2 in an inhnehtawkpui lehin an huaisenzia an tilang a, Saudi Arabia lakah chak an tum ngam dawn.

Hetihlai hian Saudi Arabia hi Uruguay an inhnehtawkpui hnuah, Spain lakah 4-0 in an mualpho a, group H table mawngah an awm.

Green Falcons (Saudi Arabia) hian 2018 aṭang khan World Cup la khel vek mah se group stage an paltlang thei lo a, kuminah pawh tla thei dinhmunah ding mah se Cape Verde hneh loa inelna mangṭha an duh dawn lo a, an chak chuan pathumna an ni thei dawn a, beisei tur a la awm avangin an theihtawp an chhuah a ngai dawn a ni.