South Africa-in knockout stage an lut

Nilaini zan group A inkhelah South Africa chuan 1-0 in South Korea an hneh a, goal awmchhun hi Thapelo Maseko khung a ni. Mexico-in Czech Republic an lo hneh avangin South Africa hi point li hmuin pahnihnaah an awm a, tla tura rinkai ber ni mah se a vawi khat nan World Cup knockout stage an lut.

Inkhel ṭan a nih hnu lawkah South Korea tan Kim Min-jae leh Lee Kang-in ten chance ṭha an hlah nghal a, South Korea-in inkhel an thunung chhunzawm. Mahse South Africa-in hma an sawn a, ball chang tlem zawk mah se an nawr ngam a, Evidence Makgopa a hun ṭha neih chhawr ṭangkai ngat se chu first half-ah hmahruai thei tur an ni.

Second half-ah South Korea bawkin an nawr hmasa a, an thiampuipa Son Heung-min luhtir mah se goal an khung thei lo a, South Africa-in an vaw let. Minute 63-naah counter attack aṭanga an nawr hnuah Thapelo Maseko chuan ṭha zetin goal kilah a khung a, South Africa chak nan a tawk.

World Cup ṭan zana an match thlirin South Africa beisei san an har a, an match hnihnaah vanneiin point khat an hlawhchhuak a, an group-a team nem bera ngaih hi group stage tawp ni a thlen meuh chuan pahnihnaah awmin an tlang daih.

Hetihlai hian South Korea tan beisei tur a la awm a, group tina ti ṭha pariatin round of 32 an khelh dawn a, point thum an hmuh bakah an goal difference a chhiat lutuk loh bawk avangin tlin chhunzawm theih dan an la nei.