Ram lian Spain leh Uruguay intawng dawn

Football khawvela ram lian pahnih Uruguay leh Spain te naktuk zing dar 5:30-ah an inhmachhawn dawn a, round of 32 luh beisei ve ve an la nih avangin inkhel hmunawm a beisei ngam.

Tlang hmabak Spain?

Spain-in Saudi Arabia lakah hliam vangin Victor Munoz an chhawr thei lo a, Liverpool forward thar hi a dinhmun a la chiang lo. Munoz tih loh hi chu an dam kim.

Spain tan Barcelona forward Lamine Yamal-a'n bul a ṭan leh thei tawh a, Saudi lakah goal a khung nghal a. Kum 18 mi Yamal hi a kum la naupang mah se field chhungah chuan puitling a ni tawh a, an khingpuite tan ve uluk bik a ngai a, Uruguay lakah pawh khelh ṭhat chhunzawm a duh ang.

Yamal bakah hian Nico Williams a la awm a, Athletic Bilbao forward hi bench aṭangin vawi hnih a lut tawhin, coach Luis de la Fuente-a'n bul a ṭantir a rinawm bawk a, Atletico Madrid player Alex Baena leh Barca forward Ferran Torres an la neih bawk avangin tlarhma an nei ṭha tawk.

Hetihlai hian Fabian Ruiz dinhmun a nghing a, Dani Olmo a khelh ṭhat avangin Barca midfielder hian a luahlan a nih pawhin a mak lo ang. Ani bakah hian Saudi laka goal hnih khungtu Mikel Oyarzabal an la nei cheu a, Real Sociedad forward hian Uruguay lakah goal dang thun a tum leh dawn.

Hriatthiam har Uruguay

World Cup vawi hnih champion tawh Uruguay tan Edinson Cavani leh Luis Suarez te hun a liam tawh a, Darwin Nunez chu an innghahna tura ngaih ni mah se Liverpool forward hlui hian goal a la khung thei lo. Hetihlai hian Indian thisen kai Maximiliano Araujo chuan goal hnih a khung tawh a, Uruguay mualpho tur chhanhimtu a ni.

Araujo bakah hian Cape Verde laka che ṭha tak Agustin Canobbio chuan hmun a chan chhunzawm zel a rinawm bawk. Hetihlai hian Ronald Araujo chu chawn hliam vangin a la inlan thei dawn lo a, Giorgian de Arrascaeta chu chhawr theih a la nih hmel loh.

Marcelo Bielsa naute hi an match hmasa berah Saudi Arabia lakah an chak dawn lo emaw tih hnuah, Araujo hmangin an siphurh an sut hram a, point khat an hlawhchhuak hram. Cape Verde lakah goal an chhuah hmasak hnuah goal hnih an khung leh nghal mah se an hmahruaina an hum zo lo a, 2-2 in inkhel a tawp.

Uruguay hian beisei pha lo mah se an zinkawng a la tawp lo a, Spain lakah thi leh thau pawlha an ṭan a ngai dawn. Hnehna chang turin Araujo bakah Nunez leh Real Madrid midfielder Federico Valverde te chu a hma aia ṭhaa an khelh a ngai tawh ang

Engtin?

Uruguay hian kum 2013 hnuah Spain hi an la hmachhawn leh lo a, La Roja lakah a zawnin vawi thum an tlawm tawh a, Spain hian he South American ram nen vawi 10 an inhmachhawnnaah goal 16 lai an thun tawh a, an chungnung zawk.

Sky Blues (Uruguay sawina) hian Spain hi an hneh a, group match danga Cape Verde-in Saudi Arabia an hneh loh bawk chuan group H hmahruaitu ni chungin round of 32 an tling thei dawn a, mahse European champion hneh hi thil awlsam a ni dawn lo.

Bielsa hote hi pakhatna aṭanga palina an la ni thei vek a, group stage paltlang an duh a nih chuan an tan chak mai a finthlak.