Leeds-ah Harry Wilson lut dawn

Premier League club Leeds United chuan Fulham aṭangin Harry Wilson an la lut dawn a, Wales international hian London club-ah a contract a hman zawh tawh avangin a duh lam club pan turin zalenna a nei.

Kum 29 mi midfielder hian season hman zawh takah khan Fulham tan hming a chher viau a, inelna hrang hrangah match 41 khelin goal 11 a khung a, assist vawi riat a nei tel bawk.

Free transfer-a a chhuah theih bawk avangin duhtu club an awm nual a, a tawpah chuan Leeds a pan dawn ta niin a lang - Fulham-ah kar khatah £55,000 a hlawh nia sawi a ni a, Leeds-ah a hlawh a pung dawn.

Wilson hian Leeds-ah hian kum rei tak atan contract a ziak dawn niin an sawi a, mahse, medical nei leh phawt tur niin, he thu buatsaih lai hian Leeds jersey a la pawt parh lo.

Fulham-in cham tura vawi tam an thlem chunga chona thar hmachhawn tura chhuah thlang Wilson hian kum 2021 khan Fulham hi Liverpool aṭangin a zawm a, khatihlaia a man zat chu pound maktaduai 12 a ni.

Leeds hian Borussia Dortmund midfielder Julian Brandt pawh lakluh tumin an ngaihven mek a, German club-a contract hmang zo tur player hi Champions League khel club ṭhenkhatin an duh avangin a inngaihtuah buai khawp ang.

Hetihlai hian Southampton midfielder Shea Charles pawh lakluh tumin Leeds hian dawr nawn an tum a, an dawrna hmasa £20mtd chu Saints hian an lo hnar tawh.