Atletico-ah Grimaldo lut dawn

Bayer Leverkusen chuan an left back Alejandro Grimaldo man atan, Atletico Madrid-in pound maktaduai 20 an thehchhuah chu an pawm a, mimal thilah pawh an inrem tawh niin journalist rintlak Fabrizio Romano-a'n a tarlang. Spanish defender Grimaldo-a'n Madrid club a pan dawn.

Kum 30 mi Grimaldo hian Barcelona-ah a career bul a ṭan a, 2016 khan Benfica-ah a insawn. Portuguese tan match 197 khelin goal 19 a khung hman a, Benfica-a kum riat a awm hnuah Leverkusen-in 2023 khan an la lut a, player pawimawh a ni nghal.

A season hmasa berah Xabi Alonso hnuaiah khelin chak loh nei loin Bundesliga an champion a, Bayern Munich record kal tluang lai an titawp. Hemi season hian Grimaldo hian match 33 khelin goal 10 leh assist 13 a nei a, an champion nan player pawimawh a ni. Germany-a kum thum a awm hnuah an ram Spain-ah a kir leh dawn.

Season hman zawh takah khan Atletico hian beisei an pha lo a, La Liga-ah palina niin Barca leh Real Madrid bakah Villarreal an tluk lo. Diego Simeone-a'n season thar a thlir lawk leh der tawh a, Grimaldo hi team tichak turin a hmu tai. Grimaldo pawh hian Atletico hi a ngainat thu a lo sawi tawh a, khelh a hreh lo tih a lo tilang tawh a ni.