Spurs keeper thar Dubravka

World Cup boruakin khawvel a luah laiin Tottenham Hotspur chuan indinthar hna an thawh chhunzawm zel a, Burnley aṭangin Martin Dubravka an la lut dawn a, Slovakia international Dubravka leh Spurs hi an inrem tawh niin journalist rintlak Fabrizio Romano chuan a tarlang.

Season liam ta khan Dubravka hi Burnley tan match 35 lai a khel a, mahse Premier League-ah a inhamtanpui zo lo. Dubravka hi a season a tawp rualin a contract a tawp ve nghal a, kum 37 mi ni ve tawh mah se Spurs-in an ngaihven a, London club tan a khel dawn.

Spurs hian an first choice Guglielmo Vicario chu an chhuahtir dawn nia sawi a awm a, Vicario duhtu zingah Juventus leh Napoli te hming a ri ring hle. Italian keeper hmun ruak hi Antonín Kinský chuan a hnawh khat dawn a, first choice thar tur a nih dawn avangin Dubracka hi 'back up' keeper tur a ni.

Roberto de Zerbi hnuaiah Spurs an insiamṭha mek a, transfer bazar-ah thawm an nei lian hle. Dubravka hma hian Jan paul van Hecke chu Brighton aṭangin pound maktaduai 52-in an la tawh a, Andrew Robertson leh Marcos Senesi te chu a thlawnin an lo la tawh bawk a, Dubravka hi tun nipuia an player lak palina tur chiah a ni.