A vawi khat nan Australia-ah India-in series la

Australia-a test series la ngai lo India chuan nimin khan test series-ah 2-1 in Australia an hneh a, Indian cricket history-ah thawnthu thar an nemkai ta - Asian team zinga Australia-a test series la hmasa ber an ni nghal bawk. 

India leh Australia hian nimin khan test series match lina, a ni 'ngana' khelh tur ni mah se ruahsur vanga an khelh theih loh avangin an inhnehtawk a. Amah-erawhchu match hmasa pathum an intum tawhna aṭangin India hian 2-1 in series an la.

Ruah sur hian inkhel hi tibuai kher lo pawh ni se an dinhmun enin India hi an chak a rinawm zawk a, series hi 3-1 a la thei dinhmunah an ding a, Virat Kohli hote hi chiang takin an chak tihna a ni.

India hian test series match hmasa ber an lak hnuah match hnihnaah an tlawm a, match thumnaah an chak zui - he boruak avang hian series match thumna hi a 'hot' dawn tih a chiang nghal.

First innings-ah ringawt India hian run 622 siamin wicket sarih an hloh a, Cheteshwar Pujara chuan run 193 ngawt siamin wicket-keeper batsman Rishabh Pant chuan run 159 siamin a tawp thleng a dam a, over 167.2-ah wicket sarih hlohin an duhtawk. 

Australia hian first inn-ings-ah over 104.5 thleng chiah daihin an out vek a, run 300 chiah an siam - hei vang hian second innings-ah pawh an hna a hautak viau a, ruah sur hian an mualpho tur a pui ang hiala sawi theih a ni zawk. 

India tan bowling lamah Kuldeep Yadav a langsar larh a, over 31.5-a khelhah run 99 chiah pein wicket nga a la - Australia tana run siam hnem ber Marcus Harris chuan run 79 bak a tlin lo. 

Australia-ah meuh test series an la a, Asian team dang la tih theih ngai loh an ti a, India captain Virat Kohli chuan series an lak chu a career-a a hun tawn ropui ber a nih thu a sawi!

Kohli chuan, "He team-a ka tel hnuah tun ang reng renga lawm hi ka nei ngai lo. Ka thil tawn tawha ropui ber a ni a, series kan lak avang hian danglam taka en kan ni tawh dawn," a ti a, 2011 World Cup nomawi a chawi ai pawhin a dah sang. 

Kum 30 mi batsman chuan sawi zawmin, "Player naupang tak tak kan la ni hlawm a, nitinin hlawhtlinna chan tumin inrintawkna nen kan bei a, he lawmna hi kan phu a ni.

"Hei hi Indian cricket tana kan hmathlir chu a ni," tiin an series lak chu a dah sang hle - India hian test series hma hian Twenty20-ah 1-1 in Australia hi an inhnehtawkpui bawk a, Inrinni aṭangin ODI series match thum an khelh tura match hmasa ber an khel ṭan ang.

Australia hian ball khawih chingpen vanga thla 12 chhung hrem tawk Steve Smith leh David Warner awm loh an tuar tih a lang a, series chhung hian an batsman zingah century siam thei an awm lo. 

India erawhin vawi nga ngawt century an siam a, heng zinga vawi thum chu Cheteshwar Pujara siam niin ani hian run 521 ngawt a vaw chhuak.

Australia captain Tim Paine chuan, "India hian zahna chibai buk an phu a ni. Australia-a hnehna chan harsatzia kan hria a, Virat leh coach Ravi Shastri te ka lawmpui hle.

"Test match hmasa ṭhen-khatah kha chuan chance kan nei ve a, a tawp lamah erawh kan tlin ngang lo a ni," tiin chak phu zawk an chak thu a sawi.