Goal sarih ni loin entu 6000 chuang zawk kha

FA Cup-ah Championship club Rotherham United chuan Premier League champion lai Manchester City an hmachhawn a, Etihad Stadium-ah goal sarih zet chhuahin goal an khung ve lo. 

Pathianni zan inkhel result hi thlir dan hrang hrang a awm thei a, khelmual aṭanga teh chuan 7-0 zeta chak Manchester City thiam zia chu a langsar lai ber a ni. Amaherawhchu Rotherham lam thlir dan a dang a, an khaw chanchinbu chuan 'goal sarih ni loin entu 6000 chuang kan neih kha kan hriat reng tur zawk chu a ni' tiin êng zawngin an thlir a, an team tihhnual an tum lo.

Pep Guardiola-a'n FA Cup-ah player ṭha tho a luhtir a, an squad chhah zia a lang. City-in ṭan phat aṭangin an nawr bet a, goal a sur dawn tih a lang nghal.

City hian first half-ah Raheem Sterling (12'), Phil Foden (43') leh Semi Ajayi (45+1') own goal hmangin Premier League champion hian hma an hruai a, second half-ah Gabriel Jesus (52'), Riyad Mahrez (73'), Nicolas Otamendi (78') leh Leroy Sane (85') ten an khung belh.

Rotherham United manager Paul Warne chuan, "Goal khat a luh khan inkhel tawp se ka lawm ngawt ang. Mahse goal hnihna an khung leh vat a, dan rual an ni tawh lo. Chutihrualin ka player-te khan an theihna zawng zawng an chhuah tih ka hria a, kha aia ṭha ka beisei tawh lo. Kan inthlauhna kha a sang em em a, ka player tlan chak ber aiin City player tlan muang ber kha a tlan chak zawk a ni," tiin an chak loh dan a pawm thiam hle.

Manchester City team remkhawm tur hian pound maktaduai 390 vel a ngai a, Rotherham team erawh maktaduai khat hnuai lama din theih a ni a, City player manto ber Riyad Mahrez chu £60m a nih laiin Millers player manto ber Jon Taylor chu £500,000 man chauh a ni.

Man City manager Pep Guardiola chuan, "Player tin kha an khel ṭha em em vek a ni." tiin a naute a fak a, Championship club tan chuan Man City khel ṭha chu an ṭha lua a ni. 

Rotherham hi an tlawm chiang chungin an ṭantute erawhin hun tawp thlengin thawm an nei ṭha a, Millers ṭantute chuan, "Rotherham i hmangaih chuan ding ta che," tiin an au a, Eithad Stadium-a entu 6000 chuang an ding a, Championship club ṭantute an fakawm. 

City ṭantute pawhin chhangletin, "Champion team tan ding ang ule," an han ti ve leh a, a ding zat erawh Millers tan el phak rual an ni lo a, khelmualah pawh an inthlau reng a ni.

FA Cup ti ngaihnaawmtu chu a upset a ni a, Pathianni zanah Premier League club Fulham leh Leicester City ten an khingpui Oldham Athletic leh Newport County an hneh lo.

Craven Cottage-ah Fulham-in Dennis Odoi (52') hmangin hma an hruai a, League Two club Oldham-in minute 76-naa Sam Surridge-a penalty leh Callum Lang (88') a goal hmangin an lehthal.

Fulham manager Claudio Ranieri chuan, "Chak lo pawh ni ila ka player-te'n za a za an pe a nih chuan ka pawm thlap, mahse chutiang chu ka hmu si lo. Kan thil tawn hi ka hrethiam lo e," tiin a lungawi lo hle.

Oldham ṭantu pakhat Pete Wild chuan Premier League club an hneh chu mumang ram tiin a sawi a, fourth round-a a tum châk ber chu Manchester United tiin a sawi. Pete hian United a thlan chhan sawifiahin, "Old Trafford-ah ngei United hmachhawn ka duh. Anni hi ka naupan lai nun rawktu an ni," a ti a, United hian 1994 FA Cup semifinal-ah Oldham hi an hneh a, hei hi tun thlenga an thlen san ber a ni.

Newport-in Rodney Parade-ah minute 10 leka Jamille Matt-a goal hmangin hma an hruai a, Foxes-in minute 82-naah sut mah se League Two club Newport hian minute thum hnua Padaig Amond penalty hmangin an chak ta tho. Leicester manager Claude Puel chuan, "Premier League-a Leicester champion puitu player pariat zet kan kawl a, player tawnhriat ṭha tak tak kan nei bawk a, chhuanlam siam tur kan ni lo," 

tiin a sawi.