Germany hnehtu Ecuador an tling

FIFA World Cup-ah Ecuador-in match hmasa pahnihah goal khung lo mah se group match tawp berah Germany kim hmachhawnin 2-1 in an lehthal a, point thum hlu tak hmuin second round an lut.

East Rutherford-a inkhelah Leroy Sane hmangin Germany-in minute hnihna lekah khung mah se Ecuador-in Nilson Angulo leh Gonzalo Plata te hmangin an chhanglet. Ecuador hian point li an hmu a, group E-ah pathumna ni mah se pathumna ti ṭha pariat zinga an tel phak avangin knockout stage an lut.

Germany kim

Germany-in hliam vangin Nico Schlotterbeck an chhawr thei lo a, left back Nathaniel Brown pawh hliam vangin an inlan thei lo. Player dang pakuate erawh bul ṭan ṭhinte vek an ni. Schlotterbeck aiah Antonio Rudiger a rawn lut a, Brown aiah David Raum a inlan bawk .

Group E-ah pakhatna dinhmun luah tawh mah se Julian Nagelsmann-a'n player-te an inhriatchian lehzual nan an ṭhat dan bera luh a thlang. World Cup an tlin theihna tura player pawimawh keeper Oliver Baumann pawh khelhna hmun pek a ni lo a, an chak leh tak si loah chuan Nagelsmann-a thutlukna a fuh em tih chu ngaihtuah tham tak a ni.

Khawnge VAR?

Germany-in minute hnihna lekah Sane hmangin goal an khung a, goal luh hma hian Aleksandar Pavlović chuan a ke chu Pedro Vite hmai zawnah a khai. Pavlovic hian ball khawih vek mah se Vite tan a hlauhawm a, foul tura ngaih a ni.

VAR-in referee thutlukna a tidanglam lo a, goal-ah an pawm. Germany an vannei a, chutihrualin second half ṭantirha Kai Havertz-a penalty hlawhchhuah VAR hmanga ennawn a nih hnuin penalty hi sut a ni thung.

Chak châk zawk

Ecuador-in chak an châk zawk a, stadium mipui tam zawkin Ecuador an ṭan a, thawm a ṭhat bakah kawr eng ha an tam. Sebastián Beccacece hoten siphurh pawh an sut hma a, box pawn aṭangin Nilson Agulo-a'n mawi zetin a pet lut.

Germany tlarhnung an talbuai a, minute 77-naah chak phu zawk Gonzalo Plata-a'n Germany keeper Manuel Neuer-a ball man hmaa tlawhin goal pawimawh bik a khung. Inkhelh banah Neuer-a'n a tihsual loh thu a sawi a, kum 40 mi keeper hi a tisual lo a ni thei a, mah se a ti ṭha tawk lo.

Group E inkhel dangah Ivory Coast-in Nicolas Pepe goal hnih hmangin Curacao 2-0 in an hneh a, pahnihna nichungin knockout stage an lut. Curacao hian Ecuador chelh thei mah se Ivory Coast an hneh loh avangin table mawngphahah an awm ta thung.