Netherlands-in goal khung an uar

Group F-a league stage inkhel hnuhnung berah football khawvela ram lian Netherlands chuan 3-1 in Tunisia an hneh a, group hmahruaitu ni chungin round of 32 an khar.

Netherlands tan Brian Brobbey leh Jan Paul van Hecke ten goal khat ve ve an khung bakah, Tunisia midfielder Ellyes Skhiri chuan an lamah a tilut. Tunisia tan Hazem Mastouri chuan an mualpho lutuk loh nan goal khat a khung ve bawk.

Arrowhead Stadium, Kansas-a inkhelah goal a lut hma a, minute thumna lekah Donyell Malen-a cross chu Tunisia captain Skhiri chuan an lamah a pet lut palh a, Netherlands hmahruaina goal a khungsak.

Oranje an phur laklawh a, minute li hnu lawkah freekick aṭanga ball kal chu Virgil van Dijk-a'n a tauh phei hnuah, Brobbey chuan chiang zeta pet goal-in, an hmahruaina a belhchhah a, Tunisia defence a pherh hle.

Second half-ah Tunisia an insiamṭha hret a, minute 54-naah corner aṭangin Mastouri chuan tauh lutin si phurh a sut ṭhen a, Eagles of Carthage (Tunisia sawina) tan beiseina a siamsak.

Mahse, an hlim chhung a rei lo a, minute riat hnu lawkah Netherlands tan Van Hecke chuan corner aṭang bawkin an chak nemnghehna goal a khung a, harsa lutuk loin Oranje an chak.

Ronald Koeman-a naute hi group of death ang hiala ngaih theihah, hmahruaitu an nih avangin champion thei turin theihna sang tak an nei. Mahse thlamuang taka awm hman an ni lo a, June 30, Thawhlehni zing dar 6:00-ah Morocco nen an inhmachhawn dawn.

Morocco hi World Cup hnuhnung bera semifinal thleng thei an ni a, zuam chi an ni dawn lo.

Hetihlai hian Tunisia erawh beisei an pha lo tluan a, Sweden an hneh loh hnuah coach thlak mah se thil a danglam phah lo. An match khelh zawng zawngah an tlawm fai vek a, goal hnih chiah khungin point an hmu lo a, an tan World Cup chhinchhiah tlak a ni lo.