Turkey-in chakin US an mangṭha

World Cup 2026-a an match hnuhnung berah Turkey an chak ve hram a, inelna thlengtu zinga mi USA chu an buzawl ngeiah 3-2 in an hneh - mahse, US nen an inhmachhawn hma hian an tla fel diam tawh a, an tan point thumin awmzia a nei tawh lo.

USA hian Turkey hmachhawn hma hian round of 32 an lut tawh a, chak lo pawh ni se, group hmahruaitu an ni chiang tawh bawk. Hei vang hian coach Mauricio Pochettino-a'n player ṭhenkhat a hahdamtir a, Australia laka 2-0 a chak team aṭangin player pakua ngawt a thlak danglam.

Mahse, US hian defender Auston Trusty hmangin minute hnih leh second 13-naah goal hmahruai an khung a, kum 2014-a Clint Dempsey-a'n Ghana laka second 30-naa a khung hnua US tana World Cup-a goal lut rang ber a ni.

US hlim chhung erawh a rei lo - Arda Guler-a'n World Cup-a goal khung lo tawpa haw bik duh loin, an si phurh a sut a, Baris Alper Yilmaz chuan minute 31-naah a belhchhah leh bawk.

Turkey-in 2-1 in hma an hruai let a, US an awm mai mai bik lo. Minute 49-naah Sebastian Berhalter chuan yard 20 vela hla aṭangin an si phurh sutna goal a khung ve leh a, 2-2 in an tawp mai dawn niin a lang tawh.

US tan bench aṭanga luhtir Christian Pulisic-a'n chance duhawm vawi thum ngawt a nei a, mahse, 'Captain America' hming lem an pek hian US fan-te lawmna tur a thlen thei lo.

A tawpah chuan Turkey zawk an chungnung ta nge nge - hun pek belh minute riatnaah Kaan Ayhan a inlar a, Galatasaray defender hian chakna goal a khung. Match hmasa pahniha rin loh taka tlawm Turkey an chak a, mahse, awmzia erawh a nei tawh lo.