Brown manah Bayern leh Frankfurt inrem

German champion Bayern Munich chuan Nathaniel Brown man atana euro maktaduai 55 an thehchhuah chu, Eintracht Frankfurt chuan an pawm a, German full back hian season tharah Bayern tan a khel tawh dawn niin journalist rintlak Fabrizio Romano chuan a sawi.

Kum 23 mi Brown hian season hman zawh takah khan Bundesliga-ah Frankfurt tan match 33 a khel a, a khelh ṭhat avangin World Cup-ah germany aiawh turin Julian Nagelsmann-a'n a ko a, World Cup-ah pawh a che ṭha nghal.

Bayern hian Brown hi tun hnai maia duh an ni lo a, a man atana club pahnih an inrem hma hian mimal thilah an lo inrem tawh nia sawi a awm a, Brown hian World Cup khelh zawhah Bayern a zawm dawn a, 2031 thleng daih tur contract a ziak dawn bawk.

English Premier League club pahnih Arsenal leh Chelsea-te'n Brown hi lakluh tum ve mah se, Bayern-in an lak khalh avangin London club pahnih tan khaw dang hawi mai a ngai dawn.

Brown man atana an thehchhuah euro maktaduai 55 aṭang hian, a club hlui FC Nürnberg chuan Frankfurt nen inremna an lo siam tawh angin euro maktaduai ruk bawr vel an chang ve ang.