Germany fiahna tur Paraguay

Germany-in FIFA World Cup 2014-a an champion hnuah a vawi khat nan knockout stage an lut a, zanin dar 2:00 hian Paraguay nen Foxborough-ah an inhmachhawn ang. Julian Nagelsmann-a hote hi group hmahruaitu ni mah se Ivory Coast lakah vannei takin an chak a, group match tawp berah Ecuador 2-1 in an hneh lo.

Die Mannschaft-in champion-zia an lantir lo a, chutihrualin Paraguay lakah erawh chak tura rinkai zawk an ni. Germany hian 2002 FIFA World Cup khan last 16-ah Paraguay hi 1-0 in an hneh a, an intawn hnuhnun ber pawh 2013 daih niin friendly match-ah 3-3 in an inhnehtawk.

Germany hian team ṭha an hmachhawn ṭumin midfield an thunun thei lo a, an champion hnuhnun ber ṭuma captain Philipp Lahm chuan, "Midfield a nghet lo a, Aleksandar Pavlović hian min la hneh lo. Tihsual a ngah a, hei vang hian Joshua Kimmich hi midfield-a awm turin ka duh. Bayern Munich-ah midfield hna hi ṭha takin a thawk tawh a, Felix Nmecha nen an inkawp rem zawk ang. Right back-ah erawh Waldemar Anton a awm thei ang. Kimmich hi right back-a a awm hian a theihna tak a lang lo," tiin a sawi.

Nagelsmann hian team a siksawi hret a rinawm a, chutihrualin Lahm duh dan erawh a tlang kher a rinawm loh zawk. Lahm hian Florian Wirtz leh Jamal Musiala ten an theihna taka an khelh chhuah loh thu a sawi a, Germany che ṭha tur chuan player theihna nei sang pahnih hi an chet ṭhat a pawimawh dawn. Tlarhma lamah Kai Havertz a hmuhnawm tawk lo a, Nagelsmann pawhin Denis Undav a luhtir zawk a nih pawhin thilmak a ni lo ang.

Germany Football Association-a technical director hna chelh mektu Rudi Voller chuan, "Ecuador hneh loh mah ila ka hlauthawng lo. Group-a pakhatna kan ni tawh a, anni erawh thih leh dam inkara awm an ni thung. Thawhṭanniah erawh kan chak lo a nih chuan kan haw dawn a, chuvangin kan theihna zawng zawng nen kan khel tawh ang," tiin a sawi.

Paraguay hi knockout stage lut zinga team nem zinga mi an ni a, group D aṭangin pathumna nichungin an inpettling hram. Group match hmasa berah United States lakah 4-1 in an chak lo a, match hnihnaah Turkey 1-0 a hnehin group match tawp berah Australia nen goal awm loin an inhnehtawk.