A hun têa rah Croatia an chak

World Cup 2026-a an match hmasa berah Croatia-in England ngam lo mah se, a hnu match hnih an khelhah an chak ve ve a, point ruk hmu chungin round of 32 an lut - Pathianni zing inkhelah Ghana chu 2-1 in an hneh.

Croatia hian chak an mamawh tih hriain, England hi inkhel ṭantir aṭangin an nawr nghal a, minute 17-naa Nikola Vlasic-a chance neih lut lote chu uiawm a tling - minute 31-naah erawh goal hmahruai an khung ta nge nge.

Inter Milan midfielder Petar Sucic chuan Mateo Kovacic-a ball pek chu mawi zetin goal-ah a chantir a, tun World Cup-a goal mawi bik zinga chhiar tel tlak a ni.

Manchester City winger Antoine Semenyo-a'n first half-ah Ghana tan chance nei ve mah se, goal-ah a chantir thei lo a, a uiawm takzet. Second half-ah Ghana an ziaawm hret a, bench aṭanga luhtir Leicester City winger Abdul Fatawu a nung ṭha hle.

Minute 73-naah Ghana hian Derrick Luckassen hmangin si phurh an sut ta nge nge a, 1-1 a ni. Team pahnih hi in draw pawh ni se, an tlang tho. Mahse, Croatia-in pathumna nih an duh lo a, pahnihna nih ngei an duh.

Ghana keeper Benjamin Asare chuan Mario Pasalic-a khung ngei tur nia lang chu ṭha zetin dansak mah se, Luka Modric-a corner aṭanga ball kal chu Vlasic-a'n a tauh lut a, Croatia-in 2-1 a hnehna changin World Cup round of 32 an lut - Cristiano Ronaldo neitu Portugal an hmachhawn dawn a, a hmuhnawm ang.