Colombia lakah Ronaldo a reh

Portugal leh Colombia ten Pathianni zing khan Miami-ah FIFA World Cup group K hmahruaitu an zawng a, goal awm loin an inhnehtawk. Khawvel mipui mit fukna Cristiano Ronaldo a che thei lo a, Portugal chhantu chu goalkeeper Diogo Costa leh VAR a ni.

Roberto Martinez-a'n knockout stage-a kawng nuam zawk zawh duhin Colombia lakah player ṭha a luhtir a, captain Cristiano Ronaldo-a'n bul a ṭan. Uzbekistan sawptu aṭangin Joao Neves chauh lakchhuah a ni a, PSG midfielder aiah Ruben Neves luhtir a ni thung.

Portugal hi chak tura rinkai zawk ni mah se inkhelah erawh Luis Diaz-a telna Colombia an chungnung a, chak phu zawk pawh an ni. Keeper Costa-a'n hna a ngah a, goal hmaah Colombia tlarhmate an hriam tawk lo. First half-ah Bruno Fernandes leh Joao Felix ten chance nei mah se goal an khung thei bik lo a, Ronaldo freekick pawh a hlauhawm tawk lo.

Second half-ah Ronaldo-a'n chance ṭha a hlah a, goal pawh ni ta reng se offside vangin pawm a ni lo ang. Ruben Dias-a tawnhriat neih ṭhat leh keeper Costa chet ṭhat zarah Portugal an him zel a, a tawpah erawh an dang seng lo.

Injury time-ah Colombia defender Davinson Sánchez-a'n a tauh lut a, chakna goal tur anga ngaih a ni. Mahse, VAR hmanga en hnuah a ke hmawr a 'offside' avangin pawm a ni ta lo. Colombia leh Portugal an inhnehtawk a, James Rodriguez-a hote hian point sarihin hmuin table-ah pakhatna an ni.

Colombia hian second round-ah Ghana an hmachhawn dawn a, an chak a nih chuan last 16-ah Switzerland leh Algeria chak zawk an hmachhawn dawn. Portugal erawh group hmahruaitu an nih phak loh avangin second round-ah Croatia an hmachhawn nghal dawn a, an chak a nih chuan Spain leh Austria chak zawk a hmachhawn ang.