Huntharin PVL champion an lawm

Hunthar Volleyball Club chuan Zirtawpni zan khan an veng YMA Hall-ah MRP Pro Volleyball League 2026 champion an lawm a, vengchhung mipui ṭhahnem tak an pungkhawm. Champion lawmnaah hi bialtu MLA K. Sapdanga chu khuallian a ni a, sports minister Lalnghinglova Hmar chu khual zahawm niin Mizoram Volleyball Association hruaituten an telpui bawk.

Mizoram home minister K. Sapdanga chuan, "Champion ni tur hian taihmakna te, inthurualna te, thawhrimna te a ngai a, chutiang zawng zawng chu in nei vek a ni. Miin volleyball an sawi apianga Hunthar Veng lo lang tel zel tur hi a lawmawm. Mizorama kan hmingthanna hi kan chhawm nun zel a ngai a ni," tiin Hunthar leh volleyball an inkawm rem thu a sawi.

Khual zahawm Lalnghinglova Hmar chuan, "Mizorama veng leh khua tam tak ten hriat hlawh bikna an neih lo a, Hunthar Veng erawh volleyball hmanga hriat in ni. Veng lian leh mi cheng an tam lo chunga volleyball hmanga hming inchher thei hi in chhuanawm," tiin a sawi a, infiamna lama Mizoram hmalakna hrang hrang a sawi tel bawk.

Champion lawmna hi session hniha ṭhen a ni a, session khatnaah an hun hman chhan ber player leh coaching staff-te chawimawna neih a ni a, session hnihnaah zaithiam nen hun hman a ni thung.