DR Congo tan mellung thar

DR Congo chuan an ram chanchina a vawi khat nan FIFA World Cup-ah knockout stage an lut. Kumin inelna match hmasa bera Portugal chelhtu DR Congo hian Pathianni zing khan Uzbekistan lehthalin 3-1 in an hneh a, Newcastle United striker Yoane Wissa chu 'hero' a ni.

Atlanta-a inkhelah Uzbekistan tan beiseina tlem tawh mah se World Cup-a point hmuh hrim hrim tumin DR Congo an hmachhawn a, an khingpui hi awlsam taka chak tir an tum lo. Congo tan erawh second round lut turin chak a tawk.

Uzbekistan-in nung takin inkhel bul an ṭan a, goal khung hma mah se offside vangin pawm a ni lo. A tirah vanduai mah se minute 10-naah Eldor Shomurodov hmangin Uzbekistan hian an khung a, goal mawi bik niin Lionel Mpasi a pet khum mawi hle. Italian manager Fabio Cannavaro pawh an khelh danah a lungawi hle.

DR Congo an insiamrem a, chak mamawh zawk an nih avangin chak turin an tuihal zawk. Season liam taa loan hmanga Montpellier tana khel Nathanaël Mbuku-a'n goal ṭha zet khung mah se goal luh hmaa amah chuhtu hmai a khawih avangin pawm sak a ni lo.

Second half-ah Congo-in an nawr na a, chance ṭha mah se darkar khat hnuah penalty an hlawh chhuak a, Wissa-a'n goal-ah a chantir. Minute 78-naah Fiston Mayele-a'n a thawhrim rah a seng a, Uzbekistan tlarhnung an fimkhur tawk loh bawk avangin hmahruaina goal khung.

Congo-in 2-1 a hma an hruai hnuah an la duhtawk lo a, injury time-ah Wissa-a'n chak nemnghehna goal a khung. Zaire hming an put laiin Congo hian World Cup an khel tawh a, kum 52 hnuah rawn tel lehin a vawi khat nan knockout stage an lut. DR Congo hian second round-ah champion rinkai zinga mi England an hmachhawn ang.