Algeria vs Austria: Beisei aia inkhel hmuhnawm

Nimin zinga World Cup group J inkhelah Algeria leh Austria an intawng a, goal ruk a lut! Team pahnih hian draw result-in an tlang ve ve tih an hre sa a, hei vang hian inkhel hmuhnawm mi tam takin an beisei lo!

Mahse, inkhel ṭantir lamah beisei loh tak thil a thleng a, team pahnih an innawr tawn - hydration break neih a nih hnuah game dul deuh mah se, minute 28-naah Austria-in goal an rawn khung a, a nung leh sawt.

David Alaba ball pek chu Marko Arnautovic chuan ṭha zetin Luca Zidane aia thlan Oussama Benbot-a venah goal-ah a chantir a, Austria-in 1-0 in hma an hruai.

Algeria-in an tlawm chuan an tla dawn tih hriain, na takin an nawr let a, minute 45-naah Rafik Belghali chuan si phurh sutna goal a khung - 1-1 in chawlhlawk hman a ni a, team pahnih an la tlang ve ve.

Mahse, minute 55-naah Algeria thin phu a rang nawn - Marcel Sabitzer chuan ram tan innghahna tlak a nihzia pholangin, 2-1 a an hmahruaina goal a khung a, inkhel a nung lehzual.

Minute nga hnu lawkah Riyad Mahrez hun a her chhuak a, Algerian mipuite ngaihsan rawn hian Houssem Aouar-a thawhrah sengin, si phurh sutna goal a khung a, 2-2 a ni.

Team pahnihin draw-in an him tih an hre miau a, 2-2 a nih hnuah innawr ai chuan ball inpek kual an thlang ve ve - stadium-a inkhel entu mipui an lungawi lo a, team pahnih an au el hial hman.

Hetiang boruakin a tuam vel lai tak, hun pek belh minute thumnaah Mahrez rawn lang thutin, Algeria goal thumna a khung a, 3-2 a ni daih! Austria an tla ngei dawn e, tiin tam takin ngaihdan an nei hman tawh.

Mahse, hun pek belh minute ruknaah Austria tan Sasa Kalajdzic a inlar ve leh a, si phurh a sut - kum 28 mi striker-in Austria si phurh sutna goal a khung hian khelmualah second 61 bak a awm hman lo! Khelmuala a hun hman rei lotê erawh World Cup knockout stage-a an ram hruai kai nan a tawk.