Spain-in Uruguay an pet tla
European Champion Spain chuan Inrinni zing khan Uruguay an hmachhawn a, ram lian pahnih inkhelah Spain chuan Alex Baena goal hmangin si khat faiin an chak a, group hmahruaitu an ni. Uruguay erawh point hnih chiah an hmuh avangin pathumnaah an awm a, World Cup an mangṭha.
Inkhel chu
Spain-in point li an hmuh avangin dinhmun ṭha takah an awm tawh a, Uruguay erawh chak mamawh mah se an fimkhur avangin inkhel boruak a nung tawk lo.
La Roja tan Lamine Yamal hmuhnawm viau mah se chance hlauhawm a siam thei bik lo a, Marcos Llorente cross chu Mikel Merino-a'n a khawih fuh tawk loh avangin Uruguay keeper Fernando Muslera-a'n a mansak.
Uruguay an bet reng bik lo a, captain Federico Valverde cross chu Darwin Nunez-a'n a khawih hman lo a, pet lut ngat se inkhel a danglam phah ang. Tottenham Hotspur midfielder Rodrigo Bentancur-a'n a hun ṭha neih chu goal zawnah a pet thei lo bawk.
Luis de la Fuente naute an vanduai reng lo a, minute 42-naah ding lam sir aṭanga Llorente cross chu Baena-a'n chang fuhin a pet nghal a, Muslera-a'n khawih hman mah se a dan ṭhat tawk loh avangin goal-ah a lut a, Spain chakna goal a ni zui.
Uruguay an zuai
Second half-ah chak mamawh zawk Uruguay an bet chhunzawm a, Spain bawk chu nawrtuah an ṭang chhunzawm a, goal an khung belh thei tawh lo thung.
Masrcelo Bielsa hote zingah che ṭha ber Maximiliano Araujo-a'n Spain lakah danglamna a thlen thei lo a, Mathías Olivera leh Nicolás de la Cruz ten hun ṭha nei mah se, Unai Simon an paltlang thei lo.
Hun tawp hma hretin Ferran Torres chuan Muslera chiah a hmachhawn hnuah goal ban a pet per a, Uruguay forward Agustín Canobbio chuan hlauhawm taka Pau Cubarsi a tlawh avangin hnawhchhuah a ni a, hun tawp zui nghalin Uruguay an tlawm.
Beisei pha lo
World Cup champion hmasa ber hi Luis Suarez leh Edinson Cavani te nei tawh lo mah se, Spain nen round of 32 lut tura rinkai an ni. Mahse Sky Blue (Uruguay sawina)-in beisei an pha lo a, Saudi Arabia leh Cape Verde an inhnehtawkpui hnuah team ṭha ber Spain lakah an tlawm a, chak nei loin an tla.
Spain erawh an match hmasa berah Cape Verde lakah goal khung loin inhnehtawkpui mah se, Saudi Arabia an sawp leh nghal a, harsa lutuk loin second round an lut. La Roja hian round of 32-ah Austria emaw Algeria an hmachhawn ang.