Cape Verde-in thilmak thlentir zel

Kumin World Cup-a ngaihven hlawh Cape Verde chu mumang ramah an chen chhunzawm zel a, Inrinni zing khan Saudi Arabia chu goal awm loin an inhnehtawkpui leh a, group stage a an match zawng zawngah chak nei lo mah se an khingpuite an 'draw' vek avangin point thum an hmu a, Uruguay chal loh chu vanneihpuiin pahnihna an ni a, second round an lut.

NRG Stadium, Houston-a inkhelah Cape Verde an chungnung zawk a, Willy Semedo-a'n ṭum hnih ngawt chance ṭha a hlah a, Saudi tan Mohamed Kanno ball tauh chu Cape Verde keeper lar Vozinha-a'n awlsam takin a mansak.

Second half ah Saudi Arabia-in hma an sawn hret a, Green Falcons (Saudi sawina) tan Mohammed Abu Al-Shamat shot chu Vozinha bawkin a man leh a, Cape Verde keeper an paltlang thei lo.

Hun tawp dawnah Cape Verde-in chance ṭha bik an nei a, Laros Duarte-a'n keeper chauh a hmachhawn hnuah a pet goal thei lo a, Nuno da Costa chuan goal ruakah a khung thei lo bawk a, hun a tawp zui nghal avangin point an insem.

Cape Verde hi an dinhmun a chiang lo hman a, mahse Uruguay an chak loh avangin pahnihnaah an awm ta tho. Amaherawhchu round of 32-ah champion lai Argentina nen an inhmachhawn dawn a, Lionel Messi leh a naute ho hneh turin vanneihna bakah huaisen tel a ngai tawh ang.