IFL leh ISL hi an inthlau lo - Chhinga

Mizoram Football Association leh Adidas ṭangkawp chuan July 1, Nilaini hian RG Stadium-ah exhibition match an buatsaih dawn. Chawhnu dar 2:00-ah stadium gate hawn ṭan a ni ang a, celebrity match inkhel inkhel en tur a awm dawn a, Mizo zaithiam larte an inlan dawn. Mipui ngaihven ber Indian Super League leh Indian Football player-te inkhel hi floodlight hnuaia khelh tur a ni.

IFL team enkawl tur coach Rochhingpuia chuan ISL team hneh ngei an tum thu Vanglaini a hrilh a, team pahnih an intluk tawk thu a sawi bawk. Chhinga thlawp tur hian MPL-a tawnhriat nei ṭha coach H. Lalrindika a awm dawn a, FC Venghnuai coach hlui hian season tharah Saikhamakawn a enkawl dawn.

MPL hnuhnung bera Chanmari FC champion puitu Chhinga chuan, "IFL-ah player ṭhahnem tak an awm a, kan thlang vek seng lo. Player 18-te hi chu inkhel tlak vek an ni a, an inlan vek dawn. Chak tumin kan khel dawn a, IFL leh ISL player-te hi an inthlau loin ka hria. IFL champion Diamond Harbour hian season tharah ISL an khel dawn a, Paul Ramfangzauva te hi chu ISL khel tura theihna nei an ni. Chutiang bawkin player dangte pawh theihna nei sang tak vek an ni," tiin Vanglaini a hrilh.

IFL-ah Mizo player 63 zet an inziak lut a, tun ṭumah hian player 18 thlanchhuah an ni Aizawl FC-in player paruk thawhin Chanmari FC-in player panga an thawh a, Diamond Harbour leh Shillong Lajong ten player pahnih thawh ve vein Sreenidi Deccan-in player pathum an thawh bawk.